會員註冊 常見問題 會員列表 搜尋 香港巴士討論中心 (HKBDC) 歡迎頁

 
 
香港巴士討論中心 (HKBDC) 首頁 -> 模型區及巴士物品區 -> "UFO" 來襲港島 (長文, 多圖注意) (主題編號=1432230)
發表新主題 回覆主題
上一篇主題 :: 下一篇主題
"UFO" 來襲港島 (長文, 多圖注意)
發表發表於: 2016-02-07 5:27 PM 引言回覆
魔法先生 Super Bus
常駐居民
 
會員編號: 210
文章編號: 3099560
註冊時間: 2002-11-19
文章: 3355
來自: 麻帆良市



(麻帆良市時報記者高坂 穂乃果報導)
大家唔好誤會, 今次我地要講嘅 "UFO",
並唔係不明飛行物體嘅 "UFO" (Unidentified flying object),
而係我地今次要介紹嘅中巴經典車款之一 -- 佳牌 Guy Arab UF 型巴士。

中巴喺 1950 年代開始, 就已經成為英國佳牌車廠嘅忠實客户,
亦成為佳牌車廠最重要嘅海外客户之一。
為左應付戰後香港人口嘅增長帶來對巴士服務需求嘅增加,
中巴喺 1954 - 1961 年間一共引進 100 架呢款俗稱 "大雞" 嘅 Guy Arab UF 型單層巴士,
全部配上由 Duple (Midland) 供應嘅雙門車身, 並且由 Metal Sections 分配同組合,
(附帶一提 Metal Sections 嘅業務後來亦喺 1980 至 1981 間比 Duple 全面收購成為 Duple Metsec。)
除左首兩架喺英國裝嵌成型先至運抵香港之外, 其餘九十多架都係喺香港由中巴裝嵌成型。
呢款巴士使用由英國 Gardner 提供, 卧置式設計嘅 5HLW 5汽缸柴油引擎,
縱罝於車廂地台底部位於兩條車軸之間, 連接先選式波箱驅動後軸,
亦道出左巴士型號中嘅 "UF" -- Underfloor 床底引擎嘅意思,
佢地亦係香港首款使用中罝引擎設計嘅巴士車款,
但係由於引擎散熱水箱亦位於車底引擎嘅前方, 喺香港呢種亞熱帶氣候嘅環境,
容易出現過熱嘅情况, 為左解決引擎散熱問題, 中巴於是喺 1967 -1969 年間,
為佢地喺車頭加裝由已經退役嘅 Tilling-Stevens "白水箱" 單層巴士拆下嘅散熱水箱,
並且配上中巴後期 Guy 單、雙層巴士常見使用嘅伯明翰式車咀,
不過亦有少數同款巴士並未有接受相若改裝直至退役。
由於佳牌車廠嘅英文名字 Guy 同 "雞" 諧音,
加上佢地長達 30 呎嘅車身同高逹近 70 人嘅載客量,
喺當時已經係港島最大型嘅車款, 因而得到 "大雞" 嘅稱號。
呢啲巴士開始投入服務時係有兩名售票員喺前後車門嘅車廂位置負責售票,
並且需要負責各自車門嘅開關, 佢地主要喺港島北岸沿線行走,
往返堅尼地城、灣仔同筲箕灣之間, 一直到 1960 年代末,
中巴嘗試推行一人控制 (One-man operated, OMO), 亦即係今日搭巴士上車入錢嘅運作模式,
由於 Guy Arab UF 嘅先天設計已經適合呢個運作模式,
呢款巴士亦順理成章成為中巴首款試行 OMO 嘅車款。
中巴更為此以鐵片釘住尾門以保持尾門關閉,
以防有人取巧由後車門上車逃票。由於中巴試行 OMO 嘅初期,
乘客並未習慣上車入錢嘅新措施, 加上只設前門上落,
令行車同上落車時間增加, 一程由灣仔去筲箕灣嘅車程竟然要超過一個鐘完成!
乘客因此而鼓噪, 甚至要驚動警察前來調停。

踏入 1970 年代, 雖然中巴已經集中購買雙層巴士,
但係仍然有使用單層巴士嘅需要, 於是中巴喺 1970 - 1971 年間,
選取其中 16 架 "大雞" 巴士, 並且進行改裝, 以求可以繼續使用多一段時間,
佢地被換上二手引入, 馬力更大嘅 Gardner 6HLW 6汽缸柴油引擎,
尾門亦被封起並且由車窗取代, 並且喺原有位置加裝座椅。
呢批巴士被編號為 601-616, 全數 "大雞" 巴士最後喺 1977年 6月正式功成身退,
喺中巴車隊服務超過廿年之久。

今日, 麻帆良市正式歡迎中巴佳牌 Guy Arab UF 單層巴士登場!!
呢款佳牌 Guy Arab UF 巴士正式全數退役之時,
亦係市長 Super Bus 岀世之年 (Super Bus 按: 喂! 妳唔好暴露我嘅年齡秘密呀!! XDD ),
加上佢係九龍人, 所以佢同呢款車真係正式一句緣慳一面,
Super Bus 話, 第一次認識 "大雞" 呢款車,
係喺 1993 年朋友買左本由 Mike Davis 出嘅中巴書度睇到返嚟,
呢款車新落地果陣車頭冇任何引擎水箱網, 令車頭感覺平滑,
以至後來巴士被加裝散熱水箱同伯明翰車咀嘅樣子,
都令佢留下深刻嘅印象, Super Bus 仲話, 原本鍾意佢車頭平滑嘅原裝線條,
覺得加裝左散熱車咀之後有令巴士原貌破相嘅感覺,
令巴士好似 "嘟左個豬咀岀嚟" 咁, 不過依家再睇又覺得佢幾趣怪,
而且始終為左引擎散熱嘅需要, 呢種改裝法亦無可厚非,
亦突顯出中巴甚至香港巴士嘅本土特色。Super Bus 仲話,
呢款外號 "大雞" 嘅巴士, 喺佢第一次認識呢款車嘅時候,
因為呢款車嘅型號 "UF" 而同佢起左另一個別名 "UFO",
我地就已經知道 "UF" 係 Underfloor 嘅意思, 咁 "O" 又係乜解呢?
Super Bus 話 "O" 就係 "Omnibus" 嘅意思, 咁都比你兜到,
Super Bus 真係你得㗎啦! 無論如何, Guy Arab UF 呢款巴士,
喺 Super Bus 心目中, 以至對於坐過呢一款車嘅老一輩港島人嚟講,
都係一款特別嘅車款喔~


隆重歡迎! 中巴佳牌 Guy Arab UF 單層巴士, 見參!!


今日同時有另外兩架新車到埗, 見另文:
http://hkbdc.info/viewtopic.php?t=1432236






證書編號 00463, 限量 500 架


正式落地!!


4113, 後來被編號為 616
















真車相, 姊妹車新落地時嘅樣子, 車頭並未加裝引擎散熱水箱


本文主角





猴年將至, 喺度借此機會講句: 恭喜發財!!


Thanks for reading~


魔法先生 Super Bus 在 2016-02-08 1:11 AM 作了第 2 次修改
檢視會員個人資料 發送私人訊息 發送電子郵件 參觀發表人的個人網站 MSN Messenger ICQ 號碼
"UFO" 來襲港島 (長文, 多圖注意)
香港巴士討論中心 (HKBDC) 首頁 -> 模型區及巴士物品區
無法 在這個版面發表文章
無法 在這個版面回覆文章
無法 在這個版面編輯文章
無法 在這個版面刪除文章
無法 在這個版面進行投票
無法 在這個版面附加檔案
無法 在這個版面下載檔案
所有的時間均為 台灣時間 (GMT + 8 小時)
1頁(共1頁)

  
發表新主題 回覆主題


正體中文語系由 phpbb-tw 維護製作

Powered by phpBB  © 2001-2003 phpBB Group Style created by Vjacheslav Trushkin