會員註冊 常見問題 會員列表 搜尋 香港巴士討論中心 (HKBDC) 歡迎頁

 
 
香港巴士討論中心 (HKBDC) 首頁 -> 模型區及巴士物品區 -> 不要做 P__, 我要真喜悅!! (長文, 多圖注意) (主題編號=1452986)
發表新主題 回覆主題
上一篇主題 :: 下一篇主題
不要做 P__, 我要真喜悅!! (長文, 多圖注意)
發表發表於: 2016-06-18 2:28 PM 引言回覆
魔法先生 Super Bus
常駐居民
 
會員編號: 210
文章編號: 3121429
註冊時間: 2002-11-19
文章: 3359
來自: 麻帆良市



(麻帆良市時報記者高坂 穂乃果報導)
踏入 1970 年代, 香港人口持續急劇增長, 市民對公共交通嘅需求亦有增無減,
當時嘅九巴同中巴喺 1970 年代初期積極增購新巴士, 以應付龐大需求,
另一方面英國本土喺 1960 年代末起全面推行一人控制嘅巴士運作模式,
呢一個決定令各巴士生產商放棄左前置引擎巴士嘅生產線,
改而全面發展適合一人控制嘅後置引擎巴士。
面對人口增長同海底隧道喺 1970 年代初通車嘅壓力之下,
中巴同九巴先後購入合共近 800 部第一代後置引擎巴士 --
Daimler Fleetline 丹拿 "珍寶", 並且希望可以喺香港依樣畫葫蘆,
推行一人控制巴士模式以減低運作成本。
可惜珍寶巴士喺使用左一段時間之後出現 "水土不服" 嘅現象,
佢地喺長期超載嘅情況下, 底盤副架同傳動軸經常不勝負荷而斷裂,
巴士嘅引擎同細小嘅水箱都設置喺車尾, 雖然令車廂環境較寧靜,
但係喺香港嘅亞熱帶氣候之下, 引擎冷卻效果十分差勁,
再者, 珍寶巴士亦欠缺駛上斜路嘅能耐, 喺香港山多平地少嘅環境下,
珍寶巴士顯然力不從心, 尤其是喺 1970 年代開始,
政府全力發展新市鎮、港島東區及南區, 當年來往市區同呢啲新發展區嘅路線,
好多都需要攀山越嶺, 例如途經大埔公路、青山公路、
獅子山隧道九龍塘入口、薄扶林道及柴灣道,
各巴士公司亦因而認定前置引擎巴士喺當時始終係一個比較可靠嘅選擇。
但係受制於當時嘅法例規定, 巴士公司必須購買由英國或者英聯邦國家生產嘅巴士,
以保障英國工業利益, 而英國嘅巴士製造商又已經停產前置引擎巴士, 喺呢個青黃不接嘅情況下,
九巴同中巴除左引進二手嘅前置引擎巴士以解決一時嘅同時,
亦持續要求英國嘅巴士生產商可以提供一款前置引擎、
可作一人控制模式及高載客量嘅巴士, 比香港市場使用。適時英國嘅 Dennis 車廠,
喺 1977 年為九巴提供一款符合九巴要求嘅新巴士 -- Jubilant (喜悦, 或者喝采),
亦係 Dennis 車廠喺 1967 年 Loline 雙層巴士停產, 闊別巴士界達十年之後,
再度進軍巴士市場嘅產品之一, 經九巴試用之後感到非常滿意,
於是向 Dennis 大量訂購 Jubilant 新巴士, 而彼岸嘅中巴,
亦喺 1979 年引入共 30 部 Dennis Jubilant 巴士 (車隊編號 DS 1-30)。
佢地全部使用由英國 Gardner 提供, 有 10.45 公升容積同 178 匹馬力嘅 6LXB 引擎,
並且將引擎安置喺前軸之前, 乘客登車用嘅前車門及駕駛室同樣在前軸的前方,
分別位於引擎嘅兩側, 令巴士更適合一人控制運作,
連接由西德 Voith 提供嘅 DIWA 851 三前速全自動波箱,
亦成為日後兩巴新巴士嘅標準機械配搭, 配上由 Alexander 提供嘅 CB 型車身,
外型與同期出品嘅利蘭勝利二型 Leyland Victory MK2 幾乎完全一樣。
加上 3+2 座位佈局, 令載客量超過 110 人,
另外佢地亦安裝左液壓輔助轉向系統, 以減輕司機轉向嘅負擔,
即使巴士滿載時, 司機仍然可以輕易應付路窄彎多嘅路段。
首架 Dennis Jubilant 巴士 DS1, 初期被中巴安排行走41號線, 途經多條長命斜, 以測試攀斜能力。
後來中巴所有嘅 Dennis Jubilant 巴士, 全部都被分配到港島東區, 主要行走 8 號同 82 號線。
至 1998年中巴專營權結束, 旗下嘅 29 架 Jubilant 巴士
(其中 DS14 因為喺 1993 年一個早上喺東區走廊突然失火全車焚毀而提早退役)
全數售予接辦嘅新世界第一巴士, 並且繼續行走來往柴灣嘅 8 號及 82 號線。
由於呢批巴士年事已高, 新巴喺 1999 年年中將佢地全數退役,
當中車隊編號 DS1 嘅 Jubilant 巴士獲暫時保留, 後來被巴士迷購入保存至今。
因為 Dennis Jubilant 嘅出現, 作為當時 "一廠獨大" 嘅 Leyland 車廠,
眼見對手 Dennis 同九巴嘅呢一切舉動亦感到壓力,
恐怕 Leyland 巴士產品喺香港嘅市場佔有率亦會隨之下降, 於是亦不甘示弱,
為香港打造一款專為香港特殊嘅運作環境而設計, 亦成為後來喺香港家傳戶曉嘅巴士車款 --
利蘭勝利二型 (Leyland Victory 2)。與勝利二型相比, Jubilant 嘅駕駛室比勝利二型狹窄,
懸掛系統亦較為差勁, 但行車卻比勝利二型穩定, 唔似勝利二型咁,
喺服役嘅 20 多年內先後發生過十多宗翻車事故。
而 Dennis Jubilant 嘅數量, 雖然不及利蘭勝利二型多,
但係亦為 Dennis 日後再度打入香港巴士市場打下左根基。

今日, 麻帆良市正式歡迎中巴 Dennis Jubilant 登場!!
對 Super Bus 嚟講, Dennis Jubilant 同勝利二型一樣,
都係陪住佢長大嘅車款之一, 雖然名堂唔及後者咁響噹噹,
不過都係因為佢地嘅事故多, 特別係翻車翻得多翻岀個名來,
令勝利二型呢款巴士嘅負面形象深入民心, 相比之下,
Dennis Jubilant 就從未試過一次翻車意外,
但係亦因為佢地所配嘅車身太相似 (大家都係配 Alexender 車身),
好多唔識巴士嘅人, 都會將呢批巴士當左係勝利二型,
就連 Super Bus 初時對巴士一無所知都一樣會咁。
Super Bus 話, Jubilant 同勝利二型就好似一對難兄難弟一樣,
皆因大家都係前置引擎, 唔只底盤格局,
就連所配嘅引擎、波箱, 以至車身外裳等, 大家都幾乎完全一樣,
不過 Jubilant 嘅引擎蓋佔位比勝利二型大, 駕駛座位亦比較矮,
司機駕駛亦難免會感到焗促, 唔似勝利二型咁有較大嘅空間感,
司機左髀仲要同側邊嘅引擎位長期親密接觸,
難怪當時有唔少行內人都將呢批車戲稱為 "燒腳毛" 啦!
Super Bus 仲話, 中巴嘅 Dennis Jubilant 佢就冇緣坐啦,
始終佢係九龍人, 而呢幾十架巴士都係活躍於港島區多,
而且印象中多數都係行 8 號同 82 號多,
不過就試過有一次朝早返學見到有一架中巴 Jubilant "打仗" 行 106,
不過就唔記得係 DS 幾啦, 反而九巴嘅就坐過唔少,
佢最記得以前坐 5D、7B 同 15 號都有唔少 Jubilant,
因為呢啲線係觀塘 / 九龍灣廠派車, 而全數 Jubilant 都係歸該廠管理,
呢款車比佢嘅印象, 除左上面所講, 駕駛座焗促,
亦因為引擎蓋佔位比勝利二型大, 上車走廊亦變得比較狹窄,
同埋佢雖然同勝利二型一樣嘅機械格局, 但係行車聲卻截然不同,
勝利二型係偏向響亮, 但係 Jubilant 則係偏向低沉
(Super Bus 按: 恕我呢度唔識形容, 總之係有唔同),
而勝利二型喺二波開始到上三波獨有嘅 "嗚嗚" 聲,
同 Jubilant 亦有分別, 又係勝利二型係偏向高音, Jubilant 偏向低沉。
或者佢中學果陣接觸勝利二型嘅機會比 Jubilant 多啦,
所以佢對 Jubilant 好似冇乜特別嘅感覺,
不過依家想再坐番佢地, 已經冇乜可能啦,
中巴亦已經消失良久, 不過所幸有熱心嘅巴士迷,
將中巴嘅第一架 Dennis Jubilant, DS1 保留下來,
喺今年二月嘅巴士大集會佢亦有亮相,
希望呢架 DS1 可以有朝一日重現昔日中巴嘅風采啦!

隆重歡迎! 中巴 Dennis Jubilant, DS24, 見參!!







證書編號 362, 限量推出 700 架


正式落地!!




往返柴灣同北角碼頭嘅 82 號線, 最常見到呢款 Dennis Jubilant 行走














作為前置引擎設計嘅雙層巴士, 司機位亦設有車門方便司機上落,
不過車門比較實同難開關, 要小心...




呢架巴士成架車最令我不快嘅地方--
因為所謂本土特色, 廠方特別喺上層車尾兩側嘅車窗整左塗鴉,
不過個人總係覺得, 出巴模就係對果款巴士嘅一種致敬 (或者只係對我嚟講),
真車你見到咁樣, 就算你唔係愛巴士之人只係普通乘客我相信你見到都會反感,
唔係個個玩模型嘅都接受到, 仲比人覺得有畫蛇添足之感,
真係萬萬希望出模型果間廠下次岀模型唔好再攪埋呢啲所謂 "本土特色" 上去!!













Thanks for reading~


魔法先生 Super Bus 在 2016-06-19 12:44 PM 作了第 1 次修改
檢視會員個人資料 發送私人訊息 發送電子郵件 參觀發表人的個人網站 MSN Messenger ICQ 號碼
發表發表於: 2016-06-22 10:17 AM 引言回覆
DYFourThreeOneFive
版面管理員
DY4315
版面管理員<br>DY4315
 
會員編號: 1,379
文章編號: 3122165
註冊時間: 2003-02-26
文章: 3031


玻璃上的字是在裏面還是在外面?無法刮走嗎?
不過BUSES的出品不知為何窗框總是這麼粗...
檢視會員個人資料 發送私人訊息 發送電子郵件 雅虎訊息通 MSN Messenger ICQ 號碼
發表發表於: 2016-06-22 1:23 PM 引言回覆
魔法先生 Super Bus
常駐居民
 
會員編號: 210
文章編號: 3122166
註冊時間: 2002-11-19
文章: 3359
來自: 麻帆良市


DYFourThreeOneFive 寫到:
玻璃上的字是在裏面還是在外面?無法刮走嗎?
不過BUSES的出品不知為何窗框總是這麼粗...

正正就係因為果啲塗鴉係印喺入面先至令我更氣結,
為左要抹甩果啲塗鴉字句而要拆開成架車實在太大工程,
而且我又怕拆爛架車, 本來我已經有一支開油水我都費事攪,
不過如果唔介意路線嘅話, 入 8 號果架就冇塗鴉嘅,
我就因為呢款車見得多行 82 先至入呢架車...
檢視會員個人資料 發送私人訊息 發送電子郵件 參觀發表人的個人網站 MSN Messenger ICQ 號碼
發表發表於: 2016-06-24 3:54 PM 引言回覆
fr3093.ctb343
留學生
 
會員編號: 10,298
文章編號: 3122466
註冊時間: 2006-02-03
文章: 538


鴨係細尾牙 難上高轉域
所以D聲未沉D囉
再加上死氣喉設計既差異就解析到點解同配搭但唔同聲

講返部模型
車裡面塗鴉
外面睇唔係應該反轉的嗎?
真係冇果樣整果樣... sosad
檢視會員個人資料 發送私人訊息
不要做 P__, 我要真喜悅!! (長文, 多圖注意)
香港巴士討論中心 (HKBDC) 首頁 -> 模型區及巴士物品區
無法 在這個版面發表文章
無法 在這個版面回覆文章
無法 在這個版面編輯文章
無法 在這個版面刪除文章
無法 在這個版面進行投票
無法 在這個版面附加檔案
無法 在這個版面下載檔案
所有的時間均為 台灣時間 (GMT + 8 小時)
1頁(共1頁)

  
發表新主題 回覆主題


正體中文語系由 phpbb-tw 維護製作

Powered by phpBB  © 2001-2003 phpBB Group Style created by Vjacheslav Trushkin