會員註冊 常見問題 會員列表 搜尋 香港巴士討論中心 (HKBDC) 歡迎頁

 
 
香港巴士討論中心 (HKBDC) 首頁 -> 模型區及巴士物品區 -> 九巴首架十二米三門巴士 (長文, 多圖注意) (主題編號=1605507)
發表新主題 回覆主題
上一篇主題 :: 下一篇主題
九巴首架十二米三門巴士 (長文, 多圖注意)
發表發表於: 2019-08-06 1:38 PM 引言回覆
魔法先生 Super Bus
常駐居民
 
會員編號: 210
文章編號: 3282542
註冊時間: 2002-11-19
文章: 3372
來自: 麻帆良市



(麻帆良市時報記者キズナアイ報導)
はい、ども! キズナアイです~♥
兩度門嘅雙層巴士喺香港大家就見得多啦,
咁你地又知唔知香港其實曾經出現過三度門嘅雙層巴士呢?
因應 1980 年代港英政府時期嘅運輸司對日後香港公共交通發展所發出嘅指引,
同埋當時對巴士長度限制嘅放寬, 英國嘅巴士製造商亦紛紛開發出車身更長,
載客量更高嘅 12m 三軸雙層巴士, 以應付香港巴士市場嘅新訴求,
其中英國 Leyland 車廠喺 1982 年向九巴提供一架 Leyland Olympian 12m 巴士,
佢係九巴接收嘅第三款十二米三軸雙層巴士嘅樣辦車,
同當時英國其他車廠出品嘅十二米三軸巴士一樣,
新車由同廠出品嘅兩軸版 Olympian 引申而來, 由當時 Leyland 轄下嘅 Bristol 車廠製作,
配上由 Eastern Coach Works (ECW) 提供嘅三門車身, 包括一扇上車前門同兩扇落車車門,
以提高巴士乘客嘅上落效率, 亦係九巴首架使用三門規格嘅雙層巴士車款。
巴士下層設計有較多嘅企位空間, 再加上上層使用 3+2 座位格局,
令佢擁有高達 160 多人嘅載客量! 巴士車身高度只有 4.17m,
比起其他雙層巴士顯得低矮, 亦係呢架巴士嘅最大特色;
新巴士落籍九巴後獲得 CV 184 嘅車牌號碼, 並獲九巴編號為 3BL1。
佢初期使用 Leyland 原廠提供嘅 TL11 Turbo 引擎, 連接同廠出品嘅 Hydracyclic 5前速自動波箱,
但係後期為左統一零件同方便維修, 於是同其他後輩睇齊,
改用 Gardner 6LXCT 引擎同 Voith DIWA D851 三前速自動波箱嘅動力配搭,
新巴士更附有中軸嘅 "八爪魚式" 轉向功能, 以減低巴士喺轉向時底盤所承受嘅壓力而變形嘅機會,
亦係當時九巴三款十二米三軸雙層巴士較為突出嘅設計。
呢架巴士初期同其他三軸新巴士行走過海隧道線 112,
亦有喺 6 號線行走, 後來落籍沙田車廠, 喺該廠派車嘅路線行走, 特別係經常行走 80K。
因為佢嘅高載量同運作表現令九巴感到滿意,
九巴喺 1983 至 1986 年間一共購入 162 架 Leyland Olympian 12米三軸巴士 (3BL2 - 163),
呢批巴士依然使用下層設計有較多嘅企位空間同上層使用 3+2 座位格局,
車身方面保留三門上落規格, 但係就改由 Walter Alexander 提供車身組件,
3BL1 於是成為九巴車隊中獨一無二, 使用 ECW 車身嘅 Leyland Olympian 12米三軸巴士。
可惜其晚年因為底盤出現問題, 最後喺 1997 年提早退役,
相比其後輩多數能夠服役至當時法定年期嘅 17 年,
最後喺九巴車隊服役嘅 Leyland Olympian 12m 巴士, 喺 2003 年先至完全退役,
3BL1 只係服役左十五年嘅時間, 無疑令人覺得有啲短壽,
但係佢所配嘅車牌號碼 CV 184, 並冇因此而從此消失,
而係被一名車主重新登記, 套用於某架私家車上。

今日, 麻帆良市隆重歡迎 Leyland Olympian 12m 巴士 3BL1 登場!
Leyland Olympian 呢款巴士, 大家肯定唔會陌生,
作為英國 Leyland 車廠喺 1980 年代最後一款引以為榮嘅巴士車款,
呢款巴士亦曾經係 1980 至 2000 年代九巴車隊嘅主力車款之一,
但係 3BL1 呢架 Leyland Olympian 12m 巴士,
對於市長 Super Bus 嚟講, 絕對係獨一無二同非常特別嘅一架,
佢話相信其他人都一樣會有同樣嘅睇法,
皆因配上 ECW 車身嘅巴士, 喺九巴車隊中亦只有四架,
包括三架兩軸版 Leyland Olympian 10.3m (BL1-3),
配用呢款車身嘅 Leyland Olympian 12 米巴士, 就只有呢架 3BL1,
作為八十年代十二米三軸巴士嘅新進成員, 佢嘅車身配搭喺當時亦教人眼前一亮。
Super Bus 話第一次喺沙田見到呢架巴士嘅時候, 已經覺得佢好特別,
渾圓嘅車身設計加上佢低矮嘅車身高度, 同佢嘅後輩形成一個強烈嘅對比,
佢仲話 1993 年九巴嘅傑出車長選舉日, 呢架 3BL1 亦有被派出作免費穿梭巴士,
Super Bus 亦有幸成為呢架巴士嘅座上客前往沙田車廠會場, 或者當時已經換左引擎波箱,
佢話感覺上同坐佢嘅後輩車冇乜分別, 但係呢次亦係佢唯一一次親身乘坐呢架巴士,
感覺無疑更加特別, Super Bus 仲話, 呢架咁獨特嘅巴士,
卻喺 1997 年因為底盤出現問題而以十五年嘅車齡提早退役, 誠為可惜,
尤幸今日呢架新到埗嘅 3BL1 模型, 將佢喺新車落地時嘅風采,
再度重現大家眼前, 亦作為向呢架 3BL1 真車嘅一個致敬!


隆重歡迎! 九巴 Leyland Olympian 12m 三門巴士, 3BL1, 見參!!



其實早於 7 月 23 日已經連同本城巴 40 週年一齊到手, 點解到今日先至出 Post?


其實就係為左等呢樣補 (寶) 品, 在下要喺度多謝鄰版版友 KuroBear 特別製作呢份 Logo 水貼,
令呢架巴士可以以真正新落地仕樣嘅風采重現大家眼前!


官方開箱 Mode, 始動!




雖然隨盒附有完整水貼, 不過呢個血紅大字 Logo 唔會喺本人呢架車上用得著


證書編號 0008, 限量推出 600 架


正式落地!!






3BL1 喺九巴終其一生囊括多個第一,
包括九巴第一架 Leyland Olympian 12m 巴士, 九巴第一架使用三門規格嘅雙層巴士,
同埋九巴第一款付有中軸轉向功能嘅巴士,
佢亦係九巴車隊中唯一使用 ECW 車身嘅 Leyland Olympian 12米三軸巴士,
但係呢架如此獨特嘅巴士, 喺佢種種風光背後, 卻不敵底盤出現問題而要以十五年車齡提早退役,
不期然令人覺得惋惜...














同後輩 3BL126 相會, 3BL126 退役後原本一度被有心人購入收藏,
可惜一場無情火令佢無法修復, 被迫報銷...




唔同嘅車身設計除左高度之外, 大家細睇下兩者有乜分別?








與同樣係 ECW 車身嘅九巴兩軸版長陣 Leyland Olympian 10.3m 相會


雖然長度唔同, 但係大家都一樣係 "矮仔"


那些年, 九巴的十二米三門巴士


真車相, 九巴喺接收呢架巴士之時已經開始轉用新嘅車隊色彩,
呢隻車身色嘅 3BL1 相信應該冇太多人會見過啦,
呢張雪地相更加難得一見, 除非香港會落雪啦...


真車相, 新落地版本果然係要配細 KMB Logo 先至為之絕配喔~ (又或者係在下嘅執著啦)




雖然真車上過 KMB 大血字 Logo, 但係個大 Logo 其實幾樣衰,
而且九巴以前用咁大個 KMB 血字做 Logo 其實我都唔係咁鍾意,
比我感覺壓迫感太大...




1993 年外購相片, 留意車頭鬼面罩已經唔係原裝款式,
取而代之係 Alexander 嘅出品




攝於 1994 年沙田新城市廣場地下巴士站,
呢架巴士可以話係 80K 嘅常用車, 值得留意嘅, 係當時九巴已經為旗下巴士陸續換上膠片牌,
取代傳統嘅布牌, 但係基於 3BL1 嘅車身高度引致車頭牌箱位置空間不足而未能安裝膠片牌,
只有保留布牌直至退役







別傳-- 中巴的 BL1 / LL1 ?
-----------------------------------

英國 Leyland 車廠喺為香港市場開發十二米三軸版 Olympian 之時,
除左打造出為九巴而設嘅樣辦車 3BL1 之外, 當然亦唔會忘記當時彼岸嘅中巴,
同 3BL1 一樣, 呢架中巴樣辦車都係由 ECW 提供車身, 但係使用雙門規格,
樓梯亦移至車身中部位置對正落車中門, 不過中巴並冇接收呢架樣辦車,
據講係因為車上搭載嘅係同廠提供嘅 Leyland TL11 引擎,
而唔係中巴傾向使用嘅 Gardner 出品, 巴士一直留喺英國, 直到城巴引入空調雙層巴士,
Leyland 同 ECW 於是將呢架巴士作出大改動, 除左使用客車規格嘅全密封式窗,
改為單門規格同改闊上車前門之外, 更加裝使用獨立引擎驅動嘅空調系統,
最後落籍城巴成為 C51, 後來改編為 102, 諷刺嘅係車上為中巴所詬病嘅 Leyland 引擎,
亦係巴士被改裝交付城巴前改為配用 Gardner 6LXCT 引擎,
假如當初中巴將呢架巴士收歸旗下, 咁佢又會唔會成為 BL1 (Bristol Leyland Long type),
定係 LL1 (Leyland Long type) 呢?







網上相片 (原圖來自 Facebook 石春大師"寶車"圖鑑 Grantbus Gallery)
https://www.facebook.com/grantbusgallery/photos/a.424787744657538/600028273800150/?type=3



睇下 "變身" 成為城巴 C51 之後嘅予定中巴樣辦車同變身前有幾多分別?





喺呢度再度多謝鄰版版友 KuroBear 相助!



Thanks for reading and god bless we Hong Kongers!
檢視會員個人資料 發送私人訊息 發送電子郵件 參觀發表人的個人網站 MSN Messenger ICQ 號碼
九巴首架十二米三門巴士 (長文, 多圖注意)
香港巴士討論中心 (HKBDC) 首頁 -> 模型區及巴士物品區
無法 在這個版面發表文章
無法 在這個版面回覆文章
無法 在這個版面編輯文章
無法 在這個版面刪除文章
無法 在這個版面進行投票
無法 在這個版面附加檔案
無法 在這個版面下載檔案
所有的時間均為 台灣時間 (GMT + 8 小時)
1頁(共1頁)

  
發表新主題 回覆主題


正體中文語系由 phpbb-tw 維護製作

Powered by phpBB  © 2001-2003 phpBB Group Style created by Vjacheslav Trushkin