會員註冊 常見問題 會員列表 搜尋 香港巴士討論中心 (HKBDC) 歡迎頁

 
 
香港巴士討論中心 (HKBDC) 首頁 -> 模型區及巴士物品區 -> [13+] 勝利二型 "紅" 遍全港 (長文, 多圖注意) (主題編號=1625008)
發表新主題 回覆主題
上一篇主題 :: 下一篇主題
[13+] 勝利二型 "紅" 遍全港 (長文, 多圖注意)
發表發表於: 2020-02-20 4:15 PM 引言回覆
魔法先生 Super Bus
常駐居民
 
會員編號: 210
文章編號: 3302379
註冊時間: 2002-11-19
文章: 3375
來自: 麻帆良市



(麻帆良市時報記者キズナアイ報導)
はい、ども! キズナアイです~♥
喺香港, 一講到勝利二型呢個名詞, 相信唔少人一定會諗起以前車身高高地,
車頭大大個黑色水箱鬼面罩加車頂 "雞冠頭", 人稱 "雞車" 嘅雙層巴士,
喺當時 1970 年代後置引擎巴士成為主流嘅年代, 呢款巴士嘅出現,
絕對可以被視為當時巴士界中嘅 "反叛份子"!

踏入 1970 年代, 香港人口持續急劇增長, 市民對公共交通服務嘅需求亦有增無減,
當時嘅九巴同中巴喺 1970 年代初期積極增購新巴士, 以應付龐大需求;
另一方面, 英國本土喺 1960 年代末起全面推行一人控制嘅巴士運作模式,
呢一個決定令各巴士生產商放棄左前置引擎巴士嘅生產線, 改而全面發展適合一人控制嘅後置引擎巴士。
面對人口增長同海底隧道通車嘅壓力之下, 中巴同九巴先後購入合共近 800 部第一代後置引擎巴士 --
Daimler Fleetline 丹拿 "珍寶", 並且希望可以喺香港依樣畫葫蘆, 推行一人控制巴士模式以減低運作成本。
可惜珍寶巴士喺使用左一段時間之後出現 "水土不服" 嘅現象, 佢地喺長期超載嘅情況下,
底盤副架同傳動軸經常不勝負荷而斷裂, 巴士嘅引擎同細小嘅水箱都設置喺車尾,
雖然令車廂環境較寧靜, 但係喺香港嘅亞熱帶氣候之下, 引擎冷卻效果十分差勁,
再者, 珍寶巴士亦欠缺駛上斜路嘅能耐, 喺香港山多平地少嘅環境下,珍寶巴士顯然力不從心,
尤其是喺 1970 年代開始, 政府全力發展新市鎮、港島東區及南區, 當年來往市區同呢啲新發展區嘅路線,
好多都需要攀山越嶺, 例如途經大埔公路、青山公路、獅子山隧道九龍塘入口、薄扶林道及柴灣道,
各巴士公司亦因而認定前置引擎巴士喺當時始終係一個比較可靠嘅選擇。
但係受制於當時嘅法例規定, 巴士公司必須購買由英國或者英聯邦國家生產嘅巴士,
以保障英國工業利益, 而英國嘅巴士製造商又已經停產前置引擎巴士, 喺呢個青黃不接嘅情況下,
九巴同中巴除左引進二手嘅前置引擎巴士以解決一時嘅同時, 亦持續要求英國嘅巴士生產商可以提供一款前置引擎、
可作一人控制模式及高載客量嘅巴士, 比香港市場使用。適時英國嘅 Dennis 車廠,
喺 1977 年為九巴提供一款符合九巴要求嘅新巴士 -- Jubilant,
經九巴試用之後感到非常滿意, 於是向 Dennis 大量訂購 Jubilant 新巴士。
作為當時 "一廠獨大" 嘅 Leyland 車廠, 眼見對手 Dennis 同九巴嘅呢一切舉動亦感到壓力,
恐怕 Leyland 巴士產品喺香港嘅市場佔有率亦會隨之下降, 於是亦不甘示弱。
喺呢個背景之下, 一款專為香港特殊嘅運作環境而設計, 亦成為後來喺香港家傳戶曉嘅巴士車款 --
利蘭勝利二型 (Leyland Victory 2) 亦因而誕生。

英國 Leyland 車廠喺 1978 - 1981 年間一共生產左 716 架勝利二型巴士,
比中巴、九巴, 以及後來嘅新大嶼山巴士使用, 並且喺 1979 - 1983 年間陸續投入服務。
呢款巴士以九巴喺 1976 年由南非引入同試用, 外號 "非洲牛" 嘅 Guy Victory J 型 (九巴編號 G1 -4)
雙層巴士底盤改良而來, 因為其底盤設計基本上係附合九巴嘅運作要求,
只係車身地台太高同操控性能較為惡劣。Leyland 除左將底盤高度降低 114mm 之外
(Guy Victory 原本係單層巴士底盤, 車身地台超高),
亦配有馬力更大嘅 10450cc Gardner 6LXB 引擎 (178 匹馬力),
連接由西德 Voith 提供, 附有內罝減速器嘅 DIWA 851 三前速全自動波箱,
同時附有液壓輔助轉向系統 (油壓呔), 令車長喺行走彎多路窄嘅地段時操控更容易。
九巴一共引入 540 架勝利二型巴士 (G5 - G543, 另外有一架為空調客車版本,
試驗失敗後被降格為普通版巴士並且被編號為 G544 )
成為呢款巴士嘅最大用家, 佔當時九巴車隊六分一之數,
成為當時九巴車隊嘅主力車款之一, 全數巴士都係使用由蘇格蘭 Alexander 提供嘅車身組件,
除左首架巴士 G5 為英國原廠裝妥車身後, 再付運到港之外,
所有勝利二型巴士都係喺當年新落成嘅屯門車身裝嵌廠組裝成型。
呢批巴士之中有 8 架被新大嶼山巴士公司喺 1985同 1991 年間二手購入,
以應付假日大量往大嶼山觀光旅遊嘅人潮。
喺呢批巴士嘅服役歲月內, 除左需要登上大帽山嘅荃錦公路之外,
佢地嘅足跡幾乎遍及全港九新界嘅九巴版圖,
但係前置引擎嘅設計, 令佢地嘅地台亦比其他款式嘅巴士為高,
上落亦唔方便, 加上呢款巴士曾經發生多宗涉及翻車嘅嚴重交通事故,
特別係 1986 年發生喺屯門嘅一宗致命九巴翻車事故,
震撼當時社會各界, 及至 1993年一架勝利二型喺元朗再次發生翻車意外,
令九巴決心淘汰呢款巴士, 最後服役於九巴嘅勝利二型巴士,
喺 1998 年正式退出載客行列, 服役九巴共 19 個年頭。

今日, 麻帆良市正式歡迎九巴利蘭勝利二型登場!!
勝利二型呢款巴士對於七、八十後嘅人嚟講都應該唔會陌生,
尤其對於市長 Super Bus 嚟講, 呢款巴士更加係陪住佢長大,
勝利二型亦係佢自小學開始第一款認識嘅巴士名字,
佢話主要係拜喺 1986 年發生喺屯門嘅一宗致命九巴翻車事故所賜,
呢宗事故震撼當時社會各界, 令勝利二型成為各大報章嘅主角,
事實上勝利二型喺佢地服役嘅廿年生涯入面, 曾經發生過不下十宗嘅嚴重事故,
當中涉及翻車嘅亦佔相當部份, 引致唔同程度嘅傷亡已經不在話下,
皆因佢地車身底盤較高, 重心亦隨之提高, 令轉彎時顯得不穩定。
撇開佢地以往嘅意外紀錄, Super Bus 話, 佢個人對勝利二型其實都係又愛又恨,
愛者, 係因為佢嘅車身外型設計, Alexander 車身嘅流線設計令人討好,
恨者, 就係因為佢地嘅前置引擎設計, 令巴士行走時下層車廂震天價響,
當佢地行高速公路或者喺隧道入面高速行走果陣引擎聲仲勁過開演唱會!
坐喺最近引擎位置嘅 "導航位" (前軸後面有一個單丁位, 或者應該叫長者位) 更令耳仔受罪,
亦都佩服揸呢款巴士嘅車長, 每日係咁揸足成日都可次面不改容咁款,
Super Bus 打趣話: "如果你果日坐雞車 (勝利二型嘅別稱) 只係坐一程,
夜晚瞓覺你喺床度就已經可以聽番果把凌厲嘅引擎聲,
喺你嘅腦海入面重播!" 不過如果以欣賞嘅角度睇, 其實都可以將之視為特色,
Super Bus 甚至將之視為享受, 坐喺 "導航位", 睇住車長喺高高在上嘅駕駛座扭扭呔盤,
攪攪門掣, 有啲車長就一邊楝起左腳一邊揸車, 夠 Cool 之餘亦有種 "揸雞車係車長嘅浪漫" 嘅感覺,
甚為有趣, 佢仲話, 以前坐 12A 返學放學, 成日都會坐到雞車 , 亦認識佢地嘅車長,
佢地話天時熱就一定會打開司機位門, 等行車果陣啲涼風撞入嚟, 咁先至冇咁熱,
不過呢一切隨住時代同車型嘅轉變, 今日坐巴士已經冇可能再見到呢啲畫面啦,
Super Bus 仲話, 如果依家仲想親嘗乘坐勝利二型巴士嘅滋味都唔係完全冇可能,
因為新巴將車隊中嘅勝利二型巴士淘汰嘅時候, 將其中一部編號 LV36 嘅勝利二型巴士,
捐贈比英國蘇格蘭巴士博物館收藏, 有機會去參觀嘅朋友亦可以一睹呢架全球僅有,
配上 Alexander 車身嘅前中巴勝利二型嘅風采, 喺一啲場合,
佢地仲會揸呢架寶貝出嚟接載參觀人仕, 咁就睇你好唔好彩坐到佢啦!
今日到埗嘅呢架九巴勝利二型巴士, 配上新落地時嘅 "紅燈籠" 色車身塗裝,
佢話 1/43 比例嘅巴士模型佢好少可入嘅, 因為始終比較大架,
而且呢架模型係 Tiny 出品, 佢對方丈嘅出品以至佢嘅作風都有一啲偏見, 所以一直以來,
所有由佢推出嘅出品佢都一概無視, 直至早前佢地推出 1/43 嘅九巴勝利二型,
配上後期紅頂紅裙腳嘅車身色彩, 睇過其他人嘅貼相同短評之後都為之心動,
本來想入但係就極速 Sold out 結果錯失左入手機會,
今次佢地再推出 "紅燈籠" 色版本嘅勝利二型, Super Bus 話今次真係點都唔可以錯過,
雖然佢第一次有印象見呢款車果陣, 已經係用上上奶黃下紅嘅 "Half and half" 車身色彩,
但係 "紅燈籠" 色感覺上更吸引, 更何況係由細陪住佢長大嘅車款,
點都有感情, 今日我地好高興呢架勝利二型巴士抵埗,
我地就一齊嚟一睹呢架新巴士嘅風采!!


隆重歡迎! 九巴利蘭勝利二型巴士, 見參!!





oops......出錯添, Sorry.....



-
-
-
-
-
-
-
-
-
ummmmmm......Can you hear me?
-
-
-
-
-
-
-
-
-
-
-
-
-
-
-
-
-
-
-
-
OK, here we go~







附有 104 同 112 路線牌, 不過我唔會換咯~






證書好似信用咭咁用膠造, 唔係咭紙一張


證書編號 0087, 限量推出 1000 架



正式落地!! Doki Doki Bus Fan Club 一齊歡迎新成員正式加入...

Well, 等陣......


Sorry, No Monika.


Alright, 正式落地 Take 2!! Doki Doki Bus Fan Club 一齊歡迎新成員正式加入!!




70 號同勝利二型巴士一樣, 已經成為歷史
























打開車門










(Super Bus 按: 仲以為踢走 Monika 篇文就唔會再有 Glitch 添, hmmm......)


繼續, 開司機位門













揾番自己啲相簿, 發覺自己原來影雞車嘅相竟然少得可憐...

姊妹車 G253 行走 61X, 攝於 1994 年




姊妹車 G53 行走 13K, 攝於 1995 年,
值得一提車頭有代表九龍灣廠嘅 K 字識別.
前官塘廠同九龍灣廠有一段長時間冇勝利二型,
全部都分別由荔枝角、沙田同屯門廠管理,
部份巴士呢個時候回歸, 亦代表佢地離退役之日亦不遠矣...




九巴勝利之光輝





比 Monika 上下鏡啦...


oops......


似乎 Monika 嬲啦, 不過唔緊要, 始終 Sayori 先至係會長,
而且呢度係在下地頭, 冇咁易比佢喺度攪亂局~



(Me) Come on Monika, let's take a picture OK?
(Monika) OK then, but just me OK? Just Monika.



Let's have a picture together okey Monika?
We all love you~




VGhhbmtzIGZvciByZWFkaW5nfg==
提示: 可到此解碼: http://www.base64decode.org
(Super Bus 按: 心水清嘅, 唔洗 Paste 去 Base64 decode 都應該知呢句係乜啦~)





Super Bus 後記: 呢排玩 DDLC 玩到出左癮, 心血來潮喺度玩一下, 請勿見笑,
BTW, DDLC 雖然係一個心理學恐懼遊戲, 但係好少可玩 PC Game 嘅我,
一玩就鍾意左, You'll love it too!

OK, 真係呢句啦~

Thanks for reading~



魔法先生 Super Bus 在 2020-02-22 1:10 PM 作了第 2 次修改
檢視會員個人資料 發送私人訊息 發送電子郵件 參觀發表人的個人網站 MSN Messenger ICQ 號碼
[13+] 勝利二型 "紅" 遍全港 (長文, 多圖注意)
香港巴士討論中心 (HKBDC) 首頁 -> 模型區及巴士物品區
無法 在這個版面發表文章
無法 在這個版面回覆文章
無法 在這個版面編輯文章
無法 在這個版面刪除文章
無法 在這個版面進行投票
無法 在這個版面附加檔案
無法 在這個版面下載檔案
所有的時間均為 台灣時間 (GMT + 8 小時)
1頁(共1頁)

  
發表新主題 回覆主題


正體中文語系由 phpbb-tw 維護製作

Powered by phpBB  © 2001-2003 phpBB Group Style created by Vjacheslav Trushkin