會員註冊 常見問題 會員列表 搜尋 香港巴士討論中心 (HKBDC) 歡迎頁

 
 
香港巴士討論中心 (HKBDC) 首頁 -> 模型區及巴士物品區 -> 中巴一中三標 (長文, 多圖注意) (主題編號=1630589)
發表新主題 回覆主題
上一篇主題 :: 下一篇主題
中巴一中三標 (長文, 多圖注意)
發表發表於: 2020-06-11 2:07 PM 引言回覆
魔法先生 Super Bus
常駐居民
 
會員編號: 210
文章編號: 3308002
註冊時間: 2002-11-19
文章: 3378
來自: 麻帆良市



(麻帆良市時報記者キズナアイ報導)
はい、ども! キズナアイです~♥
一提到 Dennis Dart 呢個名字, 相信巴士迷朋友一定冇人會唔識,
呢款由英國 Dennis 車廠喺 1988 年首度推出嘅中型巴士車款,
被公認為係 Dennis 最成功嘅巴士車款之一,
ADL 嘅 Enviro 200 亦秉承住 Dart 嘅成功,
喺今日嘅巴士市場上, 成為 ADL 最暢銷嘅巴士車款之一。

踏入 1980 年代, 因為英國巴士營運方式嘅改變,
各巴士公司都希望可以有巴士生產商提供一款介乎普通單層巴士與小型巴士之間嘅車種,
既可以彌補因為由貨車同客貨車底盤配巴士車身嘅車輛, 車身佈局嘅先天性缺點,
方便乘客上落同車長照顧乘客上落, 亦可以為乘客提供班次頻密同質素更佳嘅服務,
同時亦可以節省維修, 零件, 燃料同車長薪酬嘅開支,
促使一個巴士概念同規格嘅誕生, 佢地稱之為中型巴士,
中型巴士嘅規格設定為長度介乎 8.5m - 10m 之間, 可以提供 30 - 45 座位,
當時多間巴士生產商亦因應時勢研製各自認為符合用家要求同規格嘅中型巴士車款,
其中 Dennis 喺 1988 年首度亮相嘅 Dart 巴士, 甫一推出市場即刻為巴士公司所追捧,
佢既可提供 8.5m, 9m 同 9.8m 三個唔同長度, 亦可提供 39 至 43 座位,
配用 Cummins 6BT 5.9 公升柴油引擎, 使用後置縱列設計,
連接美國通用汽車嘅 Allison AT545 四前速自動波箱驅動後軸,
由 Duple 為 Dart 而設計嘅 Dartline 車身亦令車身賣相更富時代感,
亦可選配由其他車身供應商設計嘅車身, 迎合用家需求。

中巴亦於 1991 年引入為數共 20 部配 Carlyle 車身嘅 Dennis Dart 巴士, 車隊編號 DC 1-20,
車身設計同 Duple Dartline 完全一樣, 因為 Carlyle 由 Duple 手上購入佢嘅車身設計,
車身全長 9.8m, 可以容納 43 個座位, 另可容納 16 個企位名額,
同時配備德國 Sutrak 空調系統, 行走 260, 261 同 262,
往來中環與赤柱、舂坎角等地, 亦有喺 15、43X、84M、110 等路線出現,
隨住中巴第一條機場巴士線 -- 來往啟德機場至中環交易廣場嘅 A20 喺 1995 年 9 月投入服務,
中巴亦為部份 DC 改裝, 配上行李架以行走該線, 直至 1998 年啟德機場關閉為止,
喺啟德機場關閉嘅同年, 中巴喪失港島 88 條路線專營權, 呢批巴士亦連同其他中巴車輛,
於 1998 年 9 月 1 日過檔新巴, 並且沿用中巴時期嘅車隊編號,
不過佢地喺新巴服役嘅日子並唔長久, 其中有部份喺 2002 年退役,
另外 12 部由城巴購入, 其中兩架作為零件車之用,
最終只有 10 架正式加入城巴嘅非専利部, 車隊編號被改編為 1481 -1490,
作為行走居民路線同出租用途, 其中三架更曾經喺 2004 至 2005年間租予愉景灣巴士,
隨住大部分前中巴 Dennis Dart 巴士於 2005 至 2007年間陸續退役, 以及1482 於 2012年意外燒毀,
餘下嘅兩架 (1483 及 1488) 亦因應政府資助更換歐盟前期商業車輛嘅計劃,
於 2015 年底全數退役。

今日, 麻帆良市隆重歡迎中巴 Dennis Dart 登場,
呢款中巴嘅 Carlyle 車身 Dennis Dart 因為佢地嘅車頭設計, 而被戲稱為 "哈哈鏡",
Super Bus 話, 尤記得佢當年喺交易廣場第一次見到呢款車身矮矮地,
車頭設計特別, 行 260 嘅中巴新車, 已經比佢嘅外型所吸引,
亦估唔到中巴竟然會引入呢款令大眾眼前一亮嘅新巴士,
對於喺當時被謔為慳皮, 鍾意用舊車嘅中巴嚟講,
呢批 Dart 嘅出現多少亦可以提升中巴嘅形象,
Super Bus 仲曾經特登走去坐左一次行 261, 感覺尤其特別,
佢話自己作為紅磡人, 坐到呢批 Dart 嘅機會相對少好多,
雖然彼岸嘅九巴後來亦有引入配用 Duple Metsec 車身嘅 Dart,
其中第二批 (AA23 - 42) 更投入 212 行走, 當時住黃埔花園嘅佢,
亦經常成為呢款巴士嘅座上客, 但係相比中巴嘅 DC,
佢地果種乘坐感覺, 卻係九巴嘅 Dart 都比唔到嘅,
再加上中巴 DC 別樹一幟嘅車頭設計, 令 Super Bus 更加愛上呢批巴士,
可惜中巴嘅時代已成過去, 呢批巴士依家亦已經退役良久,
想再回味呢款中巴 Dart 嘅乘坐享受, 已經冇可能啦,
10 年前某廠推出中巴 DC 樹脂膠車模型, 作為呢款巴士嘅粉絲,
Super Bus 當然唔會錯過啦, 估唔到相隔十年之後,
再有另一間公司推出呢款巴士嘅金屬版模型,
加上因為中共肺炎疫情, 令 Super Bus 餓左左成三個幾月冇新車玩
(Super Bus 按: 依家呢個時勢乜飛機都停哂寄已經夠麻煩,
仲要驚郵包有毒添!) 話更加冇唔入嘅理由!
今日, 呢三架中巴 DC Dennis Dart, 一架樣辦色 DC1,
一架 DC8 行 110, 再加 DC2 行機場線 A20,
喺呢度一齊相聚, 將佢地昔日喺中巴服役嘅風采,
喺今日再度重現大家眼前!


隆重歡迎! 中巴 Carlyle 車身 Dennis Dart , 見參!!









樣辦車 DC1 @ 260, 證書編號 0352, 全球限量推出 500 架




DC8 @ 110, 證書編號 0221, 全球限量推出 488 架




機場版 DC2 @ A20, 證書編號 0154, 全球限量推出 450 架


正式落地!! 心跳巴士迷俱樂部歡迎您!!




樣辦車 DC1 @ 260
















DC8 @ 110
(Super Bus 按: 點解就係唔出呢隻標準色行 260 呢? 咁先至有代表性嘛!)
















機場版 DC2 @ A20




















同膠車 DC1 合照
(Super Bus 按: 兩架膠車擺左足十年, 車身都已經發黃添...)




來一個對比先~~








加中學時嘅手作仔一架




當中巴 110 遇上九巴 110


唔同嘅巴士公司, 但係同樣用單層巴士行走過海線 110


A20 DC & CX
(Super Bus 按: 架 CX 擺左成十年連啲窗都彎埋...)






加 Q 巴仔兩架






真車相, 姊妹車 DC14, 攝於 1994 年中巴柴灣車廠外, 呢個 "聖地" 亦已成為歷史...




姊妹車 DC6 @ 110, 攝於 1995 年跑馬地





Thanks for reading~
檢視會員個人資料 發送私人訊息 發送電子郵件 參觀發表人的個人網站 MSN Messenger ICQ 號碼
發表發表於: 2020-06-13 2:13 PM 引言回覆
魔法先生 Super Bus
常駐居民
 
會員編號: 210
文章編號: 3308098
註冊時間: 2002-11-19
文章: 3378
來自: 麻帆良市


啱啱心血來潮, 揾到一幅廿年前嘅劣畫
自第一眼見到呢款中巴 Dart 果一刻開始, 就已經鍾意上呢款巴士,
佢車頭嘅哈哈鏡設計係呢款 Carlyle 車身嘅最大特色,
一直以來亦希望有呢款巴士模型推出, 甚至自己親手自製以求得到心頭好
十年前某廠推出呢款巴士嘅樹脂膠車模型, 作為呢款巴士嘅忠實粉絲在下當然唔會錯過,
估唔到十年之後嘅今日, 再有廠推出金屬版模型, 不過有樣野我就有啲執著,
就係點解出左咁多架中巴 DC 仔, 就係唔出標準色行 260?
不過難得佢出到模型, Demo 車 DC1 都係行 260, 都算係償左自己嘅心願啦~

檢視會員個人資料 發送私人訊息 發送電子郵件 參觀發表人的個人網站 MSN Messenger ICQ 號碼
中巴一中三標 (長文, 多圖注意)
香港巴士討論中心 (HKBDC) 首頁 -> 模型區及巴士物品區
無法 在這個版面發表文章
無法 在這個版面回覆文章
無法 在這個版面編輯文章
無法 在這個版面刪除文章
無法 在這個版面進行投票
無法 在這個版面附加檔案
無法 在這個版面下載檔案
所有的時間均為 台灣時間 (GMT + 8 小時)
1頁(共1頁)

  
發表新主題 回覆主題


正體中文語系由 phpbb-tw 維護製作

Powered by phpBB  © 2001-2003 phpBB Group Style created by Vjacheslav Trushkin