會員註冊 常見問題 會員列表 搜尋 香港巴士討論中心 (HKBDC) 歡迎頁

 
 
香港巴士討論中心 (HKBDC) 首頁 -> 模型區及巴士物品區 -> 捷達棄將遺愛香江 (長文, 多圖注意) (主題編號=1633011)
發表新主題 回覆主題
上一篇主題 :: 下一篇主題
捷達棄將遺愛香江 (長文, 多圖注意)
發表發表於: 2020-07-31 11:58 AM 引言回覆
魔法先生 Super Bus
常駐居民
 
會員編號: 210
文章編號: 3310443
註冊時間: 2002-11-19
文章: 3379
來自: 麻帆良市



(麻帆良市時報記者キズナアイ報導)
はい、ども! キズナアイです~♥
喺香港, 一提起捷達呢個名字, 可能未必個個都知係乜名堂,
但係作為巴士愛好者以至巴士業界人仕, 呢個名字應該會耳熟能詳,
喺英國, 佢嘅英文原名 Stagecoach 名堂更加係響噹噹,
皆因佢係英國五大巴士及客運企業集團之一
(叧外四家分別係 Arriva、FirstGroup、Go-Ahead group 同 National Express),
而且更曾經喺香港發展業務, 呢間喺 1976 年由 Gloag 夫婦 Robin Gloag 同 Ann Gloag 成立,
前身名為 Gloagtrotter 以經營露營車同小巴租賃起家嘅公司,
隨著 1980 年英國開始解除對市際客車服務嘅管制,
Gloag 夫婦與 Ann Gloag 嘅弟弟, 任職會計嘅 Brian Souter 喺同年成立 Stagecoach 公司
(其後 Robin Gloag 與妻子離婚後, Robin 喺 1982 年退出 Stagecoach),
首先開辦來往登地 (Dundee) 及倫敦嘅客車服務, 其後業務擴展迅速,
而至 1986 年開始, 英國公營巴士服務私有化,
捷達因而順勢收購多間前 National Bus Company (NBC)、
Scottish Bus Group (SBG)、London Buses 以及市政府嘅巴士公司,
令佢地嘅業務更加壯大! 雄心 (野心) 勃勃而又 "具有侵略性" 嘅 Stagecoach,
更跳出佢嘅發跡地, 今日佢地嘅總部蘇格蘭, 向海外市場進軍,
先後喺新西蘭、瑞典、葡萄牙以及南非嘅馬拉維同肯雅發展業務,
矢志將其如日中天嘅業務推上最高峰, Stagecoach 亦睇中香港呢個市場,
喺 1994 年設立香港分公司捷達巴士 (Stagecoach Hong Kong) 經營屋邨巴士服務,
並且開辦兩線屋邨巴士路線 -- 801R (沙田博康村至上環港澳碼頭)
及 802R (沙田怡成坊至上環港澳碼頭) 以染指香港嘅巴士業務。
初期捷達巴士購入五架 Volvo B10M 單層巴士行走,
佢地配上由 Walter Alexander 提供嘅 PS 型車身,
除左因應香港嘅運作環境而附有空調設備之外,
都係當時 Stagecoach 喺英國常用嘅單層巴士款式同規格,
當中首兩部 (1-2) 係短陣版嘅 11m, 其餘三架 (3L -5L) 都係長陣版嘅 11.7m 規格,
佢地編號後嘅 "L" 正係表示佢地係長陣版本嘅意思,
亦因為佢地有咁嘅車隊配搭, 因而被人戲稱 "三長兩短",
而更有趣嘅, 係佢地嘅路線牌都係同時展示兩個路線號碼 (801R 同 802R) 行走。
1995 年捷達巴士再引入六架全新雙層巴士 -- 三軸版本嘅 Volvo Olympian 12m,
編號 6-11, 佢地配上 Walter Alexander 嘅 RH 型車身,
外觀同當時城巴使用嘅同款巴士如出一轍, 但係上層就用上 3+2 座位格局。

但係捷達巴士喺香港發展嘅業務並唔長久, 只有短短兩年嘅時間,
1996 年捷達決定結束其屋村巴士業務, 退出香港市場,
旗下喺香港嘅車隊, 其中六架 Volvo Olympian 被出售予城巴,
成為後來嘅 505 -510, 其餘嘅五架 "三長兩短" 單層巴士,
全數被運往捷達當時於紐西蘭嘅分公司繼續行走,
值得一提嘅, 係捷達出售比城巴嘅 Volvo Olympian 巴士,
當中 11 號車嘅車牌 GK3258 (後來成為城巴嘅 510),
因為其諧音 "生意唔發", 比人覺得唔好意頭, 後來城巴將之改為 GW1534,
而呢六架當時新落地只有僅僅一年嘅捷達棄將,
亦從此落籍城巴為其效力, 直至 2012 年間退役。
但係捷達巴士喺香港嘅故事並未因此完結, 捷達巴士喺 1999 年收購城巴,
令城巴成為首家獲得外資收購嘅本地專利巴士公司,
城巴於是為其旗下部份巴士鬆上帶有英國 Stagecoach 企業色彩嘅車身塗裝,
但係依然保留以黃色為主調, 可惜香港政府推行鐵路為主嘅政策,
對專營巴士公司實施車輛配額限制, 限制專利巴士公司開拓新路線,
透過降低專營巴士嘅競爭力保護鐵路公司嘅投資,
加上 2003年香港爆發沙士疫情, 令外資無意繼續喺香港嘅專營巴士市場投資,
Stagecoach 最終於 2003 年 6 月 9 日宣佈將城巴轉售予新創建集團,
令新創建同時擁有新巴同城巴, 港島區巴士嘅激烈競爭因此宣告結束,
捷達巴士喺香港嘅故事亦到此為止, 而捷達喺英美以外地區,
包括新西蘭、瑞典、以及南非嘅馬拉維同肯雅嘅業務,
亦分別喺 1997 至 2005 年間出售。目前捷達集團 (Stagecoach Group PLC)
主要集中英國本土同北美地區嘅巴士、市際客車、火車及電車等運輸業務,
包括旗下嘅品牌 Magicbus 英國廉價巴士服務、
英國同美加地區嘅品牌 Megabus 廉價市際客車服務、
以及北美地區嘅 Coach USA 同 Coach Canada 嘅巴士服務,
當中 Coach USA 除左美國中北、東北部以外, 其餘業務亦已經出售。

今日, 麻帆良市隆重歡迎捷達巴士 Volvo Olympian 12m 雙層巴士登場!
Stagecoach 呢個英文名詞, 喺中文即係驛馬車嘅意思,
但係喺英國, Stagecoach 亦係今日英國五大巴士及客運企業集團其中一個響噹噹嘅名字!
市長 Super Bus 話第一次認識 Stagecoach 呢間公司,
係佢喺中學果陣有一次睇 "車主" 雜誌嘅巴士迷專欄,
介紹九巴退役嘅 Daimler E "長牛" 巴士喺南非馬拉維出現嘅故事,
當中 Stagecoach 希望尋找合適嘅車款喺當地行走, 於是透過香港嘅必達巴士,
引入九巴退役嘅 Daimler E "長牛巴士, 令佢地喺馬拉維繼續延展佢地嘅生命力,
Super Bus 亦因此認識 Stagecoach 呢個名字, 同時喺 1990 年代,
Stagecoach 更曾經投資於必達巴士上, 並且透過該公司於 1992 年競投中巴 26 條路線,
不過最終失敗, 後來更退股必達, 自此 Super Bus 就留意呢間公司,
佢憶述話, 當時以佢認知, Stagecoach 呢間公司可謂非同小可,
皆因佢喺英國以快速收購其他巴士公司得以壯大而聞名,
係一間非常之具侵略性嘅公司, 並且將佢嘅 "爪" 向外伸展,
以圖染指海外市場, 佢亦記得睇過一篇報導, 指曾經有公司想收購中巴,
而該公司正係當時業務日中天嘅 Stagecoach! 後來喺荃灣 "車賞堂" 睇巴士書
(Super Bus 按: 唔知仲有冇人記得呢間喺荃豐中心嘅模型店呢?)
介紹 Stagecoach 嘅車隊, 佢地嘅巴士使用全白色車身,
加上搶眼嘅橙、紅、籃三色彩帶圍繞整個車身嘅企業色塗裝,
在在令 Super Bus 留下深刻嘅印象。及至 1993 年下旬某日週末,
Super Bus 坐巴士由九龍入屯門, 當時佢坐喺上層右邊車頭位置,
當巴士喺屯門公路過左深井之後, 赫然有架單層巴士喺右邊嘅中線飛過,
睇真啲, 呢架巴士車身竟然上有英國 Stagecoach 嘅橙、紅、籃彩帶車身塗裝,
車尾亦有 Stagecoach 加其中文名字 -- 捷達巴士嘅字樣,
由車尾嘅標誌得知, 呢架巴士係 Volvo B10M, 配上 Alexander 車身,
係佢地喺英國常用嘅車款, 不過佢附有車頂冷氣組件,
巴士只有 T 字 (試車) 牌, 越過 Super Bus 所坐嘅巴士之後向屯門方向飛馳,
呢個時候 Super Bus 內心興奮到爭啲想嗌出嚟 (Super Bus 按: 呢個真係冇誇張㗎!)
同時佢腦內亦彈出第一個意識 -- Stagecoach 終於要打入香港啦!!
後來喺香港島間唔中見到佢地行蹤, 亦影過佢地相,
不過最令 Super Bus 感到更加震撼嘅, 係 1995 年某日,
同某位陳姓朋友去金鐘影車, 突然見到一架全城巴車身規格,
上左捷達色嘅 Volvo Olympian 出現, 而且引擎聲一聽完全唔同,
唔係 Cummins 引擎而係 Volvo 自家引擎,
Super Bus 頓時嘩左一聲, 估唔到捷達玩到咁大入雙層車!!
後來 Super Bus 一次同佢朋友有機會坐呢款巴士由沙田去上環,
一程十幾蚊嘅車程行高速公路經大老山隧道行觀塘繞道入東隧,
再上東區走廊直達上環, 佢話果種感覺可以用爽爆嚟形容,
正當 Super Bus 期望有機會試坐佢地嘅 B10M 單層巴士嘅時候,
估唔到喺 1996 年收到一個消息 -- 捷達將會退出香港業務,
意味住想再坐香港嘅捷達巴士已經再冇機會啦,
儘管後來捷達一度擁有城巴, 最終亦喺多年後退出香港市場,
注定捷達與香港無緣, 但係 Stagecoach 依然喺香港留下一段歷史,
今日我地好高興呢部捷達 Volvo Olympian,
將佢地昔日喺香港嘅風采, 喺今日再度重現大家眼前!


隆重歡迎! 捷達巴士 Volvo Olympian 12m 雙層巴士, 見參!!









證書編號 0588, 全球限量推出 688 架


正式落地!!




同一路線牌上顯示兩個路線編號, 只有香港嘅捷達巴士做得到


11 號車車牌 GK3258, 皆因其諧音 "生意唔發"
加上佢地單層巴士車隊嘅 "三長兩短" 配搭,
經常成為巴士愛好者嘅笑柄












港英捷達小相會, 單層嘅 Dennis Dart 前車主正係城巴




新舊捷達拉花, 你會鍾意邊款?




East meet west


曾經係唔同嘅巴士公司, 有誰會想到曾經係同一天空下,
又有誰會想到最後會留守喺香港為新主人效力直至退役?


Stagecoach in Hong Kong

Volvo B10M, 4L 攝於 1994 年






姊妹車 6 號, 攝於 1995 年








攝於 1996 年, 前捷達巴士 10 號車加入城巴成為城巴 #509, 依然保留捷達車身拉花




同樣保留捷達車身拉花嘅城巴 508, 前捷達巴士 9 號車





------------------------------------------------------------------------------------------------------------------------------

題外話: 最近開始玩 Doki Doki Blue Skies 玩到一個每個人都唔想見到嘅 Ending,
(謜諒我嘅幼稚, 我真係有少少喊左出嚟)
希望借此喺呢度有感而發, 如果你身旁有朋友有抑鬱症,
佢地需要我地嘅幫忙同支持, 唔係輕輕帶過置之不理就係解決問題之途,
雖然要經過一段時間, 但係佢地需要我地嘅支持,
同佢地一齊度過難關, 將雨雲清走



Thanks for reading~


魔法先生 Super Bus 在 2020-07-31 12:21 PM 作了第 2 次修改
檢視會員個人資料 發送私人訊息 發送電子郵件 參觀發表人的個人網站 MSN Messenger ICQ 號碼
捷達棄將遺愛香江 (長文, 多圖注意)
香港巴士討論中心 (HKBDC) 首頁 -> 模型區及巴士物品區
無法 在這個版面發表文章
無法 在這個版面回覆文章
無法 在這個版面編輯文章
無法 在這個版面刪除文章
無法 在這個版面進行投票
無法 在這個版面附加檔案
無法 在這個版面下載檔案
所有的時間均為 台灣時間 (GMT + 8 小時)
1頁(共1頁)

  
發表新主題 回覆主題


正體中文語系由 phpbb-tw 維護製作

Powered by phpBB  © 2001-2003 phpBB Group Style created by Vjacheslav Trushkin