會員註冊 常見問題 會員列表 搜尋 香港巴士討論中心 (HKBDC) 歡迎頁

 
 
香港巴士討論中心 (HKBDC) 首頁 -> 模型區及巴士物品區 -> 70 年代的豪華享受 (長文, 多圖注意) (主題編號=1472492)
發表新主題 回覆主題
上一篇主題 :: 下一篇主題
70 年代的豪華享受 (長文, 多圖注意)
發表發表於: 2016-09-30 3:50 PM 引言回覆
魔法先生 Super Bus
常駐居民
 
會員編號: 210
文章編號: 3142876
註冊時間: 2002-11-19
文章: 3355
來自: 麻帆良市



(麻帆良市時報記者高坂 穂乃果報導)
踏入 1970 年代, 香港經濟起飛, 市民普遍收入增加,
擁有私家車嘅市民數字亦不斷上升, 同時亦引起塞車同空氣污染等環境問題,
因此當年嘅港英政府提議香港嘅巴士公司開辦一啲高質素嘅豪華巴士服務,
以吸引市民放棄駕駛私家車外出工作同消遣娛樂。當時豪華巴士嘅定義,
係有舒適嘅乘坐, 保證有位坐, 不設企位, 停站數目少同埋快到目的地。
九巴喺試用過由英國 Bedford 車廠出品嘅兩架 YRQ 型單層豪華客車之後,
認為豪華巴士服務大有作為, 因此落實開辦豪華巴士路線服務,
而車款嘅選取方面, 作為亞比安 Albion 巴士嘅忠實用家, 九巴亦不作他選,
向 Leyland/Albion 車廠分批訂購合共 100 架 Viking EVK55CL 型單層豪華巴士,
並且破天荒地使用由 Duple 提供嘅 Dominat MKII 型車身, 由英國原廠裝妥車身後,
再運抵香港。呢批巴士使用 Leyland E0.401 引擎,
連接同廠出品嘅 G277/281 5前速手動波箱。
新車配以啡色加忌廉色嘅車身色彩配搭, 裝有大型車窗,
並且設有高背座椅, 而每一排座位上方都設有吹風機嘅獨立出風口,
(其中有2部更試驗性地安裝空調系統,
分別使用美國 Thermo King 同日本三菱嘅岀品, 但係最終失敗收場)
除左其中兩部可以坐 46 人之外, 佢地可以坐 42 人, 全部不設企位,
而其中 21 部被安排行走機場豪華巴士嘅 Albion 豪華巴士,
更設有行李架位置, 方便乘客安放手提行李, 載客量因而減至 38 人。
喺當時來講, 佢地嘅規格的確比當時喺香港服役嘅任何一款巴士都要豪華,
但係當然車費相對地亦較其他路線高昂。
呢批巴士被九巴編號為 CA1-66, 68-77, 79-102
(其中 67 同 78 比左九巴後來購入, 上文提及嘅 Bedford YRQ 豪華巴士,
成為後來嘅 CB67 同 CB78), 但係喺佢地整個服役嘅年期內,
從來未喺車上鬆上任何車隊編號。

九巴喺 1975 年起開辦多條豪華巴士路線, 全部以 2xx 開首,
而駕駛豪華巴士嘅車長, 都係由眾多車長中挑選出來,
並且經過測試先至可以符合資格駕駛。
雖然豪華巴士服務初期大受好評, 有部份路線例如首條開辦嘅 206,
同 204 等路線, 因為佢地嘅路線穿梭鬧市而最受歡迎,
而機場豪華巴士路線 200 同 201 號線亦有唔錯嘅客量,
但係只係維持左數年時間, 加上部份豪華巴士路線服務嘅地區,
對呢啲巴士服務嘅需求並唔大, 呢啲 "新鮮感" 過後, 客量就逐年下跌,
再者地下鐵路喺 1979 年通車, 為市民提供更快捷舒適嘅服務,
九巴嘅豪華巴士服務大計, 最終喺 1980 年代初, 慘嘗滑鐵盧嘅滋味,
唔少路線因為客量不足而取消, 只有一條 208 路線,
卻可以奇跡地服務至今。因為路線取消而多出嚟嘅巴士,
部份巴士被九巴改作訓練巴士, 或者被拆去全車車身,
改裝成各式各樣嘅貨車同工程車, 用作九巴車廠嘅物資運送,
或者為喺路上壞車嘅巴士作搶修服務, 以盡量利用佢地嘅剩餘價值,
亦有較幸運嘅, 被調去部份低客量路線, 例如 5M 同 82K ,
作 "另類升級" 嘅巴士服務,
此外亦有部份巴士出售予粵港巴士, 喺深圳繼續行走。
隨住機場豪華巴士路線 200 同 201 號線,
喺 1980 年代中引入配有空調系統嘅 Dennis Falcon 巴士,
提供更舒適嘅服務, 呢批 Albion 豪華巴士頓時更加顯得落後,
只有黯然敗走香港, 最後服務於九巴嘅 Albion 豪華巴士,
喺 1990 年正式退役, 並且由九巴首度引入嘅日本車款 --
24 座位嘅豐田 Coaster 中型巴士全面取代, 服務九巴只有 15 年時間。
有 6 部巴士退役後連同退役嘅九巴 Daimler E 型 "長牛" 巴士被必達巴士購入,
並且轉運至南非嘅馬拉維, 服務當地嘅人民,
九巴亦將其中一部最後退役嘅 Albion 豪華巴士, 捐贈比交通安全會,
作為該會嘅宣傳巴士之用。

今日, 麻帆良市正式歡迎九巴 Albion Viking EVK55CL 豪華巴士登場!!
呢款巴士對市長 Super Bus 嚟講可以話係一款印象難忘嘅車款之一,
佢話因為喺佢四、五歲仲讀幼稚園果陣, 家住紅磡嘅佢,
有時會見到一啲啡色車身, 有啲身上寫有 "機場豪華巴士" 字樣嘅巴士,
由馬頭圍道轉入大沽街, 再經機利士路上橋去九龍車站再去尖沙咀,
但係就唔知係乜野路線啦, 而呢款車喺尖沙咀區亦係見得最多,
佢地帶有弧形嘅車頭車尾擋風玻璃同兩側大幅車窗,
加上獨特嘅車身線條, 同其他路上見到嘅巴士有著好明顯嘅分野,
雖然 Super Bus 無緣搭到呢啲巴士, 依然令佢更加印象尤深。
Super Bus 仲話, 喺 1993 年九巴傑出車長選舉,
見到一架似曾相識嘅巴士, 做左交通安全會嘅宣傳巴士,
睇真啲, 原來就係佢以前細個喺尖沙咀成日見到嘅啡色亞比安豪華巴士啦!!
不過事隔多年, 唔知呢架巴士依家又去向如何呢?
Super Bus 又概嘆, 呢批亞比安豪華巴士本來係可以大有作為嘅,
可惜生不逢時, 車費高昂都係其次, 只因地鐵通車,
人地更加快捷舒適仲有冷氣嘆, 咁就即刻令到九巴嘅豪華巴士服務慘淡收場!!
"你冇冷氣人地有, 人地仲要唔洗同人塞車兼停燈位, 係輸蝕啲㗎啦!" 更糟糕嘅,
就係呢一大批當時車齡都唔算太高嘅豪華亞比安, 除左仲可以行機場路線之外,
真正成為九巴車隊中嘅雞肋, 九巴唯有將呢啲因為路線取消而多出嚟嘅巴士,
用得就用賣得就賣, 一啲就將佢地賣去深圳,
又或者調入去九巴車長訓練學校做訓練巴士,
又或者改裝成各式各樣嘅貨車同工程車, 甚至賣大包行走一啲低客量路線,
實行盡量用到盡, 用得唔好嘥! 喺 Super Bus 心目中,
佢認為如果果陣汽車冷氣技術發展成熟,
而呢批豪華亞比安又裝有運作可靠嘅空調系統嘅話,
佢地絕對會係一批絕對更好坐嘅巴士,
"如果唔計較佢地係用葉片彈簧而唔係用氣墊懸掛嘅話。"
講到九巴嘅豪華巴士服務因為地鐵通車而慘淡收場,
Super Bus 只有回應: "就算廿一世紀嘅今日都係咁啦,
更何況依家港府嘅交通策略係以鐵路為主導,
幾多巴士線一有龜鐵新線開啲客量就即刻跌哂 Watt 呀! 時代唔同,
巴士喺香港公共交通嘅角色都已經變左啦..."
無論如何, 呢款亞比安豪華巴士, 始終都喺香港公共交通發展史上走過歷史嘅一頁,
而佢亦期待左呢款模型推出左好耐, 苦候左 "三年又三年, 三年又三年",
今日佢終於都得償所願啦! 今日呢兩部亞比安豪華巴士,
一部普通版另一架機場版, 等大家去重温佢地昔日喺九巴服務時嘅風采!


隆重歡迎! 九巴 Albion Viking EVK55CL 豪華巴士, 見參!!















市區版亞比安豪華巴士, 證書編號 0514, 全球限量 700 架




機場版亞比安豪華巴士, 證書編號 0455, 全球限量 700 架


正式落地!! 由我地嘅崎玉師兄來一個 One Punch Welcome!!




市區版亞比安豪華巴士


246 往麗瑤, 唔知我有一位以前住麗瑤姓陳嘅朋友, 佢以前又有冇坐過呢條線呢?










由車尾睇, 車廂頂部嘅行李架真係堅正!!






司機位亦落足心思, 連波棍都做埋, 真正無懈可擊!!



機場版亞比安豪華巴士


200 係啟德機場時代 A2 嘅前身, 隨住機場搬遷, A2 亦成為歴史
























同普通版九巴 Albion Viking EVK55CL 單層巴士相會


相同嘅底盤, 但係唔同嘅車身配搭,
論車身設計, 豪華巴士版嘅 Duple Dominat MKII 車身,
無疑比普通版配用嘅聯合汽車車身裝湟得多,
但係論乘坐舒適, 除左豪華巴士有高背座椅會坐得比較舒適之外,
都應該唔會相差太多啦, 仲未計要忍受引擎嘅高分貝聲浪呢!


九巴 70 年代嘅豪華巴士


作為九巴首條開辦嘅豪華巴士路線, 206 亦係首條引入空調雙層豪華巴士嘅路線,
並且派出配有空調設備嘅 Dennis Jubilant 同勝利二型行走,
可惜車上嘅空調系統並唔可靠, 加上載客量太低等種種因素,
最後亦失敗收埸, 巴士後來更被降格為普通熱狗巴士再繼續行走直至退役,
但係佢地嘅失敗亦為九巴帶來一個寶貴嘅經驗,
更為今日九巴車隊全空調化埋下左一條伏線


70 年代中、九兩巴嘅豪華巴士 -- 中巴 MCW Metrobus 同九巴亞比安,
雖然大家都冇冷氣, 始終當時巴士裝設空調嘅技術仲未成熟,
但係論行車時嘅乘坐舒適, 行車寧靜加配有全氣墊懸掛嘅中巴 Metrobus,
肯定比行車時引擎聲震天價響, 兼使用傳統葉片彈簧避震嘅九巴亞比安更勝一籌,
當然揸亞比安果個都有夠辛苦啦!


中巴當年開辦嘅豪華巴士路線, 到今日亦只有 260 依然健在,
但係營運者亦已轉由城巴接手經營






真車相, 姊妹車 BH3015 (CA13) 於 1975 年 1月 31 日首日航行走 206,
並且由時任運輸署長麥法誠喺美乎巴士總站主持啟行儀式


真車相, 姊妹車 BH3002 (CA1) 首日航行走 206,
留意新車車身新到港時更帶有新設計嘅箭咀型 KMB 標誌,
但係後來被人投訴指標誌設計唔吉利, 呢個新標誌只係維持左好短時間,
就比 "KMB" "正字" Logo 取代


真車相, 姊妹車 BH7637 (CA56) 攝於 1995 年洪水橋,
與一批已退役嘅九鐵 Metrobus MK I 一齊停泊,
最記得果次同朋友坐輕鐵去到果度落車影相, 見到呢架車之後心情難以形容!
逗留期間仲走上其中一架已退役嘅九鐵 Metrobus MK I 巴士玩掣鈕 (呢樣真係找死!)
佢係九巴最後退役嘅亞比安豪華巴士之一, 喺 1990 年退役後,
捐比交通安全會作為宣傳巴士之用, 並且鬆上圖中嘅塗裝,
並且換上新車牌 EL1075, 唔知相隔廿一年, 呢架巴士依家去向如何呢?



咪以為呢架九巴貨車同巴士無關呀!
查實呢架 BL1822 嘅前身, 正係一架亞比安豪華巴士, 車隊編號 CA93,
喺 1988 年退役後被拆去全車車身, 再改裝成呢個密籠貨車嘅樣子,
用作九巴車廠嘅物資運送, 係咪完全睇唔出呢?
難怪嘅, 皆因係兩個完全唔同嘅樣子嘛,
但係只要追查車牌號碼嘅來歷就無所遁形啦,
攝於 1994 年旺角彌敦道, 荷李活中心外






Thanks for reading~


魔法先生 Super Bus 在 2016-09-30 4:19 PM 作了第 1 次修改
檢視會員個人資料 發送私人訊息 發送電子郵件 參觀發表人的個人網站 MSN Messenger ICQ 號碼
70 年代的豪華享受 (長文, 多圖注意)
香港巴士討論中心 (HKBDC) 首頁 -> 模型區及巴士物品區
無法 在這個版面發表文章
無法 在這個版面回覆文章
無法 在這個版面編輯文章
無法 在這個版面刪除文章
無法 在這個版面進行投票
無法 在這個版面附加檔案
無法 在這個版面下載檔案
所有的時間均為 台灣時間 (GMT + 8 小時)
1頁(共1頁)

  
發表新主題 回覆主題


正體中文語系由 phpbb-tw 維護製作

Powered by phpBB  © 2001-2003 phpBB Group Style created by Vjacheslav Trushkin