會員註冊 常見問題 會員列表 搜尋 香港巴士討論中心 (HKBDC) 歡迎頁

 
 
香港巴士討論中心 (HKBDC) 首頁 -> 模型區及巴士物品區 -> 落籍中巴的 "倫敦人" (長文, 多圖注意) (主題編號=1483781)
發表新主題 回覆主題
上一篇主題 :: 下一篇主題
落籍中巴的 "倫敦人" (長文, 多圖注意)
發表發表於: 2016-12-06 3:55 PM 引言回覆
魔法先生 Super Bus
常駐居民
 
會員編號: 210
文章編號: 3155362
註冊時間: 2002-11-19
文章: 3353
來自: 麻帆良市



(麻帆良市時報記者高坂 穂乃果報導)
倫敦運輸局 London Transport 喺 1969 - 1976 年間,
向英國 Daimler 車廠 (後來被 Leyland 收購) 購買合共 2646 架
Daimler Fleetline (DMS) 雙層巴士, 成為全球最大嘅 Daimler Fleetline 買家,
原意係替代當時服務已久嘅 AEC Regent (RT)、AEC Regal (RF)
同 Routemaster (RM) 巴士, 同引入一人控制運作模式,
初時 London Transport 對呢批新巴士抱有好高嘅期望,
甚至為佢地冠以 "Londoner" 嘅稱號, 希望得到有如當年 AEC Routemaster 嘅效果。
但係喺服役期問, 佢地喺倫敦嘅行車同運作表現,
都令倫敦市民、司機以至 London Transport 感到強差人意,
London Transport 保守嘅車輛維修制度, 更令呢批巴士唔適合 LT 嘅日常車務運作,
迫使 London Transport 喺 1978 年宣佈將呢批平均服役只有僅僅八年嘅 DMS 巴士提早退役,
並且流入二手市場放售, 其中中巴喺 1980 - 1984 年間,
分批引入合共 208 架倫敦二手 DMS 巴士, 成為全港引入 DMS 最多嘅巴士公司,
呢批巴士被編為 XF1-206 (其中 XF206 被改裝為豪華巴士並且改編為 FC1,
叧外兩架中嘅其中一架喺卸下葵涌貨櫃碼頭時發生嚴重意外, 整個車身幾乎盡毀,
後來比城巴購入作為零件車之用, 另一架被中巴作為訓練巴士並且號為 T19)。
中巴喺選購呢批巴士嘅時候, 更指定要選購配有 Park Royak 車身,
同 Gardner 6LXB 引擎嘅 DMS 巴士 (倫敦 DMS 嘅巴士車身分別由 Park Royal,
同 MCW, Metro-Cammell Weymann 負責建造; Daimler 比 Leyland 收購之後,
亦有提供 Leyland 嘅0.680 引擎, 同後來嘅 0.690 引擎作為 DMS 嘅動力來源)。
為左適應香港嘅氣候同運作環境, 呢啲 DMS 巴士都經過改動,
除左車窗改作全趟式之外, 倫敦式嘅車頭路線牌箱, 亦被改作 "反 T 型" 嘅設計,
車頭下層嘅原裝弧形擋風玻璃, 基於通風嘅理由亦被改作可開啟嘅平面車窗。
鑑於以往 '珍寶" 巴士喺香港使用嘅經驗, 佢地喺倫敦服務時使用嘅自動變速系統,
亦被改作半自動波操作。佢地初時被派往行走接駁地鐵站嘅 M 線,
但係由於巴士喺香港嘅表現良好, 因此中巴再加碼訂購, 並且將之派往港島北岸主幹線服務,
亦因為佢地靈活性高, 更一度成為南區赤柱路線 6、6A、61、63、64、65、66 嘅主力車款。
隨住中巴喺 1993 年同 1995 年因為分別失去 28 條同 14 條路線引致車隊過剩,
大量 XF 連同一批 LF 及佳牌阿拉伯五型(LX)分兩批被集體除牌,
除左有部份 XF 喺 1994 年經商人運往中國大連行走之外, 其餘都喺香港被拆毀。
最後喺中巴服役嘅 XF 巴士, 喺 1997 年 3 月退役。
雖然中巴 XF 未能過渡至 1998 年同新巴專營權交接,
但係佢地喺中巴服役嘅時間平均超過 10 年, 依然比喺倫敦行走只有七、八年嘅時間仲要長得多,
亦令佢地可以喺中巴盡展佢地嘅所長同埋靈活性, 比喺倫敦服役時期活得更精采!

今日, 麻帆良市隆重歡迎中巴 Daimler Fleetline DMS "倫敦寶" 登場!!
呢款曾經喺八、九十年代活躍於香港嘅 ""倫敦人" 巴士,
市長 Super Bus 話, 雖然九巴曾經喺同一時期亦引入過同款巴士,
而且雖然數目唔及中巴多但係亦有一百架之數,
但係始終唔及中巴嘅印象咁深刻, 而且呢批 "倫敦寶" 喺中巴一直服役至九十年代,
相比起九巴嘅一批行左只有六、七年就退, 中巴嘅 "倫敦寶" 無疑長命同強而有力得多,
或者就係因為當初中巴訂購呢款二手巴士果陣, 定下左嚴謹嘅買車要求啦,
Super Bus 話, 呢款車佢過對面海亦坐過唔少次, 特別係去赤柱或者淺水灣,
都一定會搭到呢款車, 因為當時去呢啲地方嘅巴士線,
都係以呢款巴士做主力, 或者就係因為取其只有 30 呎長嘅車身,
夠哂靈活, 可以適應果度較挾窄嘅路面嘅關係啦,
佢話中巴嘅 "倫敦寶", 雖然上左中巴色, 而且細節上亦有改動過,
但係上左車你亦唔難發現仲留有佢地喺倫敦服役時期倫敦運輸獨有嘅規格,
車廂亦唔係中巴標準嘅藍色配搭 (座椅除外), 甚至仲有倫敦運輸嘅告示添!
仲記得呢款巴士嘅落車門貼有 "NO ENTRY" 嘅黑底白字告示嗎?
呢個亦都係喺倫敦服役果陣遺留落嚟嘅, 當然喺香港一樣適用啦,
只係冇左中文咁解唧! 相比起九巴嘅 "倫敦寶",
Super Bus 話佢印象中都冇坐過幾多次, 最有印象都只係坐過行 14C,
而且感覺亦冇中巴嘅咁強烈, 因為九巴嘅 "倫敦寶" 係經過大改至出街嘅,
而且連車廂亦跟足九巴嘅標準, 相比之下,
中巴嘅 "倫敦寶" 既有 "本土化" 之餘亦不乏當年倫敦原有嘅特色,
而且更難得, 或者諷刺嘅, 係呢款曾經喺倫敦被寄予厚望嘅 "Londoner",
喺彼方服役時嘅表現招惹各界批評, 甚至比倫敦運輸宣佈為不受歡迎嘅車款,
最後仲要大批放棄, 但係呢批行左唔夠七、八年嘅倫敦壯丁,
卻比喺地球另一邊嘅香港睇中, 仲喺中巴得到重用,
喺香港大放光采, 並且一直服役至 1997 年先至完全功身退,
而且平均每架車服役嘅年期仲長過喺倫敦服務嘅日子,
到底當年 London Transport 有冇諗過佢地當時嘅買車方針到底 "錯在哪裏" 呢?
倫敦市民甚至 London Transport 見到呢款曾經比佢地唾棄嘅 "倫敦人",
喺彼方嘅香港卻可以盡展所長, 大放異彩,
唔知佢地又會有乜野反應, 又或者感到汗顏呢?!
無論如何, 呢批 "倫敦寶" 喺中巴立下嘅汗馬功勞, 係值得我地肯定嘅,
今日呢架坡上 "藍戰士戰衣" 嘅 "倫敦寶" 巴士,
正好為呢款巴士作出一個致敬!!

隆重歡迎! 中巴 Daimler Fleetline DMS "倫敦寶" 巴士, 見參!!







證書編號 0577, 限量 600 架


正式落地!!


















當中巴 XF1 遇上中巴 XF123,
XF1 係 EFE 喺 1999 年嘅出品, 相差十多年,
當時能夠出到中巴色嘅倫敦寶, 就算冇精細内籠, 亦總算有真車神髓,
已經冇得再要求太高...




來一個對比先~~




留意車尾引擎位嘅旁板, 真車中巴引入初期係有嘅,
不過只係維持左好短時間就全部拆除




難得呢架倫敦寶整埋獨立引擎, 讚!!




當倫敦 DMS 遇上中巴 XF




真車相, 姊妹車 XF111 攝於 1994 年柴灣中巴車廠




真車相, 姊妹車 XF135 攝於 1996 年巴士大集會,
留意呢架巴士嘅車頭路線牌箱並未有改作 "反 T 型"


留意坐喺司機位影相嘅係邊個?



喺搜尋資料期間, 無意間發現呢架模型 XF123, 真車曾經喺 1988 年炒過大鑊,
不過巴士未有因此而退役, 而且更被修復, 之後一直行走至 1993 年先至退役,
香港巴士大典有以下節錄:
http://hkbus.wikia.com/wiki/%E5%9F%8E%E5%B7%B45B%E7%B7%9A
1988年10月11日:一輛往銅鑼灣方向的中巴丹拿珍寶(XF123/CW2833)
在皇后大道西美新樓外因閃避橫過馬路的行人而越過對面行車綫,
再閃避迎面駛至的公共小巴時失控鏟上行人路,並撞入一間顧繡公司,
巴士司機、4名乘客及過馬路者受傷送院


(相片來自中華巴士紀念館)
http://www.chinamotorbus.com/bus/jumbo/photo_details.php?photo=7806&search=exact


而講到呢款巴士喺中巴涉及嘅嚴重事故, 印象最深莫過於呢單柴斜翻車事故啦,
事件中嘅中巴司機事後更傷重不治, 涉事嘅 XF46 事後亦因此退役。
在下亦有用呢宗事故作為當年中二嘅剪報家課,
可惜該份剪報已經丢失, 但係依然可以喺 Youtube 重温當年嘅事故
https://www.youtube.com/watch?v=jGLOJKQ-MaA

Thanks for reading~


魔法先生 Super Bus 在 2016-12-06 3:57 PM 作了第 1 次修改
檢視會員個人資料 發送私人訊息 發送電子郵件 參觀發表人的個人網站 MSN Messenger ICQ 號碼
落籍中巴的 "倫敦人" (長文, 多圖注意)
香港巴士討論中心 (HKBDC) 首頁 -> 模型區及巴士物品區
無法 在這個版面發表文章
無法 在這個版面回覆文章
無法 在這個版面編輯文章
無法 在這個版面刪除文章
無法 在這個版面進行投票
無法 在這個版面附加檔案
無法 在這個版面下載檔案
所有的時間均為 台灣時間 (GMT + 8 小時)
1頁(共1頁)

  
發表新主題 回覆主題


正體中文語系由 phpbb-tw 維護製作

Powered by phpBB  © 2001-2003 phpBB Group Style created by Vjacheslav Trushkin