會員註冊 常見問題 會員列表 搜尋 香港巴士討論中心 (HKBDC) 歡迎頁

 
 
香港巴士討論中心 (HKBDC) 首頁 -> 模型區及巴士物品區 -> 中巴珍寶新形象 (長文, 多圖注意) (主題編號=1510667)
發表新主題 回覆主題
上一篇主題 :: 下一篇主題
中巴珍寶新形象 (長文, 多圖注意)
發表發表於: 2017-06-15 2:47 PM 引言回覆
魔法先生 Super Bus
常駐居民
 
會員編號: 210
文章編號: 3184461
註冊時間: 2002-11-19
文章: 3353
來自: 麻帆良市



(麻帆良市時報記者高坂 穂乃果報導)
隨住香港首條海底隧道, 即係依家嘅紅磡海底隧道喺 1972 年正式通車,
多條行走過海隧道嘅巴士路線亦相繼投入服務, 並且由中巴同九巴共同營運,
而呢啲巴士路線亦越來越受歡迎, 客量需求亦有增無減,
兩巴於是喺 1974 年起, 大量引入 33 呎長版本嘅 Daimler Fleetline "珍寶" 雙層巴士,
以滿足海隧巴士線嘅服務需求, 當中中巴亦喺 1974 - 1977 年間,
分批引入合共 305 架 33 呎長版本 Daimler Fleetline "珍寶" 雙層巴士
(LF1 - 305), 但係兩巴初期引入嘅 "珍寶" 新巴士,
都係使用由 Metal Section 提供嘅巴士車身, 外型幾乎完全一樣,
儘管後來中巴訂購嘅其中一批 "珍寶" (LF31 - 105) 所配用嘅 Metal Section 巴士車身,
已經喺一啲車身細節上作出改動, 務求要同彼岸嘅九巴同款車身作出分野,
但係外觀上依然太相似, 全無分別可言,
再加上當時中巴嘅巴士使用同九巴相似嘅上奶黃下紅嘅車身塗裝,
更令乘客容易混淆。到後來 Metal Section 為其中一架中巴珍寶 --
LF106 配上一套全新設計嘅車身, 但係呢套車身外型太有抄襲嘅味道,
有如將當時另一間位於蘇格蘭嘅車身供應商 -- Walter Alexander,
佢地推出嘅 L 型車身設計特點強加於 Metal Sections 車身之上,
亦達唔到中巴要求 "別樹一幟" 嘅目的,
更令中巴萌生喺訂購下一批珍寶時另尋車身供應商嘅意念。
適時中巴亦引入左一款全新嘅 Ailsa-Volvo B55-10 型雙層巴士 (AV1),
其使用嘅 Alexander 車身, 除左外觀上達到中巴要別樹一幟嘅要求之外,
車身大量採用玻璃纖維物料, 維修亦比 Metal Sections 車身更省時方便,
因而得到中巴嘅垂青, 從而喺 1975 年開始以後訂購嘅 "珍寶" 巴士訂單,
都係由 Alexander 提供車身, 而 Alexander 更從此成功打入香港嘅巴士車身市場,
為日後香港巴士公司訂購嘅新巴士提供車身。 本文主角 LF107 就係其中之一,
佢係中巴首架配用由 Alexander 提供車身嘅 "珍寶" 巴士,
喺蘇格蘭嘅 Alexander 廠房完成裝嵌之後, 於 1976 年中抵港,
並且於 7 月 16 日取得 BL483 嘅車牌,
佢亦係中巴唯一一架喺原產地完成車身裝配至到港嘅 Alexander 車身"珍寶" 巴士。
LF107 喺中巴經歷左長逹 22 年嘅服務生涯, 一直到 1998 年 8 月底中巴專營權壽終,
當時中巴車隊中, 仲有九十多架 LF "珍寶" 巴士,
當中包括 LF107 在內嘅 72 架 LF "珍寶"連同其他中巴同伴一齊過檔新巴,
並且喺第二日 (9 月 1 日) 起為新主人效力,
但係以佢當時已經有超過廿年車齡, 加上當年新巴嘅積極革新,
隨住新巴訂購嘅新巴士陸續付運抵港同投入服務,
佢喺新巴服役嘅日子亦唔長久, 一直到翌年,
即係 1999 年嘅 7月至 8 月間連同當時新巴車隊內僅餘嘅 LF "珍寶" 巴士退役,
服役於新巴只有短僅僅一年嘅時間。

今日, 麻帆良市正式歡迎中巴 Alexander 車身 Daimler Fleetline "珍寶" 巴士登場!!
中巴嘅 "Alexander" 車身 "珍寶" 巴士, 因為佢地嘅車身線條,
比人一種流暢嘅感覺, 加上因為頭尾車頂嘅兩個呈尖型纖維組件,
因而得到 "流線寶" 同 "尖頂寶"嘅稱號,
市長 Super Bus 話, 以前細個同屋企人過對面海,
見到呢啲車頂頭尾尖尖地嘅巴士, 樣貌同勝利二型十分相似,
但係身為九龍人嘅佢, 反而唔見九巴有呢款巴士,
後來大個左睇車主雜誌介紹, 先至知道呢款巴士係由 Alexander 提供車身比中巴嘅,
本來係中巴為左要別樹一幟嘅車身配搭,
的確, 初時只有中巴先至有呢款車身,
加上後來中巴改用上奶黃下藍嘅 "藍戰士" 車身塗裝,
確實為中巴改變左新形象, 但係隨住後來 Dennis Jubilant,
同利籣勝利二型巴士嘅出現,
佢地同樣配有同中巴 "亞記珍寶" 樣貌相同嘅 Alexander 車身,
甚至九巴因此而擁有超過七百架同款車身嘅巴士,
數目比中巴仲要多, 變左配 Alexander 車身嘅巴士,
已經唔再係中巴嘅專美啦, Alexander 車身亦係市長 Super Bus 最喜愛嘅車身之一,
由以前中巴珍寶、雞車鴨車使用嘅 CB / KB 型車身,
後來嘅 R 型車身, ALX 系列車身, 以至依家 ADL 嘅 Enviro 系列車身,
佢都不得不愛, 或者就係因為怇以前搭巴士,
接觸得由呢間車身供應車身嘅巴士多, 因而有一個情意結啦,
但係 Alexander 嘅車身出品, 比人線條明快嘅感覺同容易維修嘅優點卻係無庸置疑嘅。
Super Bus 仲話, 坐中巴 "亞記珍寶", 感覺比起坐九巴嘅同款巴士仲要爽,
或者係中巴後期引入嘅 '珍寶" 巴士, 機械配搭有少少唔同啦,
因為佢地都配有 "風油呔" 裝置, 停車手掣亦係使用拉風式設計,
相比起彼岸九巴嘅同款巴士, 依然全部使用齒牙式手掣同冇動力輔助嘅轉向系統,
中巴嘅 "亞記珍寶" 喺當時的確比人感覺先進得多,
加上中巴時代嘅司機大佬們, 幾乎個個都好似車神上身一樣,
佢地揸呢啲 "亞記珍寶", 比九巴車長揸同款巴士更加起勁,
由坐 70 號由中環經香港仔隧道入香港仔,
到坐 107 由香港仔行香港仔隧道 "捐山窿" 再入紅隧 "潛水過海" 返九龍,
都領會到 "亞記珍寶" 嘅 "爽"! 可惜依家要再享受中巴 "亞記珍寶" 嘅超爽旅程,
已經冇可能啦。仲記得 1998 年,
當年嘅 ABC 推出左一款所謂 1/76 嘅中巴 "亞記珍寶" 模型,
但係比例錯到九彩, 連 Super Bus 都話買唔落手
(Super Bus 按: 果陣我都已經人在美國, 又冇好似今時今日咁可以有咁多門路入香港款巴士模型,
又冇咁多銀根, 想入都未必有機會入啦, 不過 ABC 出嘅中巴 "亞記珍寶",
真係你送比我都唔要咯!) 直到今年 2017 年,
另一間廠商推出中巴 "亞記珍寶", 比例比 ABC 嘅前作準確之餘,
真車嘅神髓亦終於返哂嚟, 我地好高興今日可以喺呢度,
再次一睹中巴 "亞記珍寶" 嘅風采!

隆重歡迎! 中巴 Alexander 車身 Daimler Fleetline "珍寶" 巴士, LF107, 見參!!







證書編號 034, 限量 400 架


正式落地!!


















當九巴圓頂寶遇上中巴亞記寶


如果唔細心留意巴士公司 Logo, 甚至車身外型,
驟眼睇佢地嘅車身塗裝, 會唔會令大家將兩家公司混淆呢?
雖然中巴嘅紅色較為橙色


三款唔同車身嘅長珍寶, 你又會鍾意邊款呢?


真車相, 喺蘇格蘭 Alexander 廠房留影




LF 107 新落地行走 102




連中巴 1975 / 76 年報都用 LF107 做封面同封底,
可見當年中巴對呢款新巴士係何等重視








為左要別樹一幟, 中巴再下一城, 喺車身色做功夫,
設計出幾種試驗色, 最後定案採用上奶黃下藍嘅 "藍戰士" 車身塗裝




期待 "藍戰士" 塗裝亞記寶快將推出~


Thanks for reading~


魔法先生 Super Bus 在 2017-06-15 10:13 PM 作了第 1 次修改
檢視會員個人資料 發送私人訊息 發送電子郵件 參觀發表人的個人網站 MSN Messenger ICQ 號碼
中巴珍寶新形象 (長文, 多圖注意)
香港巴士討論中心 (HKBDC) 首頁 -> 模型區及巴士物品區
無法 在這個版面發表文章
無法 在這個版面回覆文章
無法 在這個版面編輯文章
無法 在這個版面刪除文章
無法 在這個版面進行投票
無法 在這個版面附加檔案
無法 在這個版面下載檔案
所有的時間均為 台灣時間 (GMT + 8 小時)
1頁(共1頁)

  
發表新主題 回覆主題


正體中文語系由 phpbb-tw 維護製作

Powered by phpBB  © 2001-2003 phpBB Group Style created by Vjacheslav Trushkin