會員註冊 常見問題 會員列表 搜尋 香港巴士討論中心 (HKBDC) 歡迎頁

 
 
香港巴士討論中心 (HKBDC) 首頁 -> 模型區及巴士物品區 -> 大人氣的紅色九巴 ● 玻璃梯的誘惑 (長文, 多圖注意) (主題編號=1617450)
發表新主題 回覆主題
上一篇主題 :: 下一篇主題
大人氣的紅色九巴 ● 玻璃梯的誘惑 (長文, 多圖注意)
發表發表於: 2019-11-24 4:22 PM 引言回覆
魔法先生 Super Bus
常駐居民
 
會員編號: 210
文章編號: 3294698
註冊時間: 2002-11-19
文章: 3373
來自: 麻帆良市



(麻帆良市時報記者キズナアイ報導)
はい、ども! キズナアイです~♥
配 Wrightbus 車身嘅 Volvo 巴士大家一定唔會陌生, 皆因佢地喺香港已經隨處可見,
單係 Volvo B9TL 呢款巴士底盤, 配上 Wrightbus 車身呢個配搭,
已經係香港各家巴士公司, 購買 Volvo 新雙層巴士時嘅指定配搭。
Volvo B9TL 呢款巴士底盤, 自 2002 年推出以來, 為香港各巴士公司所採用,
總數超過千架之多,單係九巴已經有超過 800 架之數,
絕大多數都配上由 Wrightbus 提供嘅 Eclipse Gemini 同後來嘅 Eclipse Gemini 2 車身。
但係佢地使用橫置引擎, 尾軸驅動嘅設計, 喺行車靈活性上,
往往比其他三軸巴士車款, 例如對手 ADL 嘅 Enviro500 吃虧,
但係呢款三軸巴士底盤, 直至 2016 年仍然冇後繼車型而繼續生產。
Volvo 車廠原本無意開發新型號嘅柴油引擎雙層巴士取代三軸版 B9TL,
而係重點投放資源研發更環保嘅混合動力巴士與電動巴士。
不過,Volvo 近年喺激烈競爭嘅雙層巴士市場上, 佔有率有所下跌,
加上混合動力巴士與電動巴士, 售價普遍較柴油引擎巴士高昂,
而且喺實際應用上仍然存有唔少限制,
因此 Volvo 車廠以 B8R 客車底盤為基礎開發新款低地台三軸版雙層巴士,
作為三軸版 B9TL 嘅後繼車型。九巴喺 2016 至 2019 年間, 先後接收三架 Volvo B8L 新巴士,
分別配上由 Wrightbus 車身提供嘅 Wright Eclipse Gemini 2 車身 (AVBWL1),
同香港首次出現, 配上由 MCV 車身提供, 人稱 "埃及妖后" 嘅 EvoSeti 車身 (AVBML1 同 2),
新巴士改用縱置引擎同中軸驅動嘅設計, 同對手 ADL 嘅 E500 MMC 睇齊,
而 AVBWL1 除左係九巴亦係全港首架 Volvo B8L 巴士之外,
更被九巴包裝為 "全港首部歐盟六型雙層柴油動力巴士", 以作宣傳。

2018 年 1 月, 載通國際為九巴訂購嘅 209 架 Euro 6 廢氣排放標準嘅巴士訂單之中,
其中 150 架為 Volvo B8L 12m, 新巴士於 2018 年 10 月起陸續抵港,
並且於今年三月起陸續投入服務, 車隊編制為 V6B。新巴士除左配用 Euro 6 標準,
有 350 匹馬力嘅 7.7 公升輕量化嘅 Volvo D8K 引擎, 同 ZF EcoLife 六前速自動波箱外,
更配上香港首見嘅 Wrightbus Gemini 3 車身, 車身線條一改以往同廠出品嘅 "金蛋"、"紅蛋" 形象,
以比人戲稱 "三尖八角" 嘅強烈形象示人, 並且採用玻璃樓梯設計, 喺樓梯旁備有玻璃幕牆,
在在香港首創; 新巴士一如早前嘅 "紅巴", 使用 City Red 塗裝, 但係車頂嘅 "城市脈搏" 標誌已不復存在,
取而代之係銀色 "KMB" 標誌, 並且將車身下半部改為塗上完整九龍巴士標誌 KMB,
車身兩側銀線亦經過修改。新嘅巴士款式配上全新嘅車身配搭,
加上經過修改嘅車身塗裝, 令九巴嘅全新紅巴形象更加呼之欲出,
亦吸引一眾巴士愛好者嘅熱烈追捧!

今日, 麻帆良市隆重歡迎九巴 Wrightbus Gemini 3 車身 Volvo B8L 登場!!
呢款被戲稱 "三尖八角" 嘅 Wrightbus G3 車身, 市長 Super Bus 話起初睇到佢個樣,
真係完全睇唔慣, 完全唔係以往 Wrightbus 果種 "圓碌碌" 嘅風格,
果種視覺衝擊非常強烈, 實在令人難以一時間接受得到,
直到九巴引入配上呢款車身嘅 Volvo B8L 新巴士, 再慢慢經過一段時間,
先至接受到呢款車身嘅線條設計, 正如早前佢曾經講過,
Wrightbus 車身嘅設計特色, 就係要比人一種強烈嘅視覺衝擊,
令人一時間接受唔到, 但係慢慢你就會接受到佢,
正如同廠出品嘅新倫敦巴士 "Borismaster", Super Bus 更曾經戲稱佢為 "Boris Monster" 添!
不過佢亦補充話, 呢款車身都要睇下配乜野車身拉花先至好睇,
今次九巴嘅 "City Red" 拉花同呢款車身出奇地配搭得宜,
加上採用玻璃樓梯設計, 令呢款巴士更令人眼前一亮!
講到玻璃樓梯設計, 喺香港有唔少保守派指有關設計會容易令著裙嘅女乘客走春光乍洩,
甚至要求將玻璃封左佢咁話, Super Bus 對此嗤之以鼻, 甚至指呢啲所謂衛道之士嘅言論,
係荒唐同食古不化! 佢話呢個設計喺英國嘅雙層巴士, 早喺上世紀五十年代初已經使用,
可以由車外為樓梯走道採集光線, 呢款 G3 車身, 延續左同廠 Broismaster 嘅玻璃樓梯位設計,
Super Bus 話係一個非常可取嘅設計, 可以令樓梯走道感覺開揚,
令乘客上落更安全, 而且亦好難得九巴會接納呢個設計,
希望香港嘅部份保守派人仕可以以欣賞呢個角度去看待呢個設計,
唔好話要封左佢又乜又物, 就連 Lothian Buses 批三軸版 B8L,
使用對家 ADL 提供嘅 E400 XLB 車身都起用呢個設計,
甚至九巴最新嘅 E500 12.8m 都用上呢個設計嘅時候,
就知呢個設計唔係單純貪時尚嘅設計, 而係真係有佢不可抹殺嘅實用價值。
講到 Wrightbus 呢間公司, 早前因為財政問題宣佈破產,
依家有新嘅買家購入呢問公司, Super Bus 亦希望 Wrightbus 呢個品牌可以繼續保住,
就連 ADL 都比北美最大嘅巴士工業巨頭 New Flyer 收購嘅時候,
Wrightbus 就係英國最後一家真正英國人揸旗嘅巴士製造商啦,
無論如何, 呢款 Wrightbus G3 車身 B8L 喺香港登場之後大受巴士愛好者追捧,
今日我地好高興呢款巴士載譽抵埗, 我地就一齊嚟一睹呢架新巴士嘅風采!!


隆重歡迎! 九巴 Wrightbus Gemini 3 車身 Volvo B8L, 見參!!











證書編號 0426, 限量推 1000 架


正式落地!!


















九巴 Wrightbus の進化論






當 G2 B9TL 紅巴遇上 G3 紅巴


新舊紅巴拉花, 大家會鍾意邊款多啲呢?






與同廠出品嘅玻璃梯前輩 Borismaster 相會






紅巴之集會










本來影到呢度就算, 但係實在忍受唔到玻璃梯嘅誘惑,
都係忍唔住影番多幾張玻璃梯特寫先~~~






Wooo~~~~~~!!!


睇乜野呀?! 你個好色鬼!!


魔法先生 Super Bus 奉勸各位男仕們, 坐巴士上樓梯遇到前面有著短裙嘅美女,
千祈唔好亂咁望呀, 否則後果自負~~~


Thanks for reading~
檢視會員個人資料 發送私人訊息 發送電子郵件 參觀發表人的個人網站 MSN Messenger ICQ 號碼
大人氣的紅色九巴 ● 玻璃梯的誘惑 (長文, 多圖注意)
香港巴士討論中心 (HKBDC) 首頁 -> 模型區及巴士物品區
無法 在這個版面發表文章
無法 在這個版面回覆文章
無法 在這個版面編輯文章
無法 在這個版面刪除文章
無法 在這個版面進行投票
無法 在這個版面附加檔案
無法 在這個版面下載檔案
所有的時間均為 台灣時間 (GMT + 8 小時)
1頁(共1頁)

  
發表新主題 回覆主題


正體中文語系由 phpbb-tw 維護製作

Powered by phpBB  © 2001-2003 phpBB Group Style created by Vjacheslav Trushkin